O‘zbek mobil operatori: «Notanishni rom qil!»

«Oila va jamiyat» gazetasi (10.05) mobil aloqa kompaniyalari «xizmatlarining milliy ma'naviyatimizga tahdidi» haqida bong urdi.

Unda mobil aloqa operatorlari tomonidan SMS tarzida tarqatiladigan «Notanishni rom qil», «Yolg‘izlikdan qutul», «Bahorda sevgingni top» kabi tiyiqsiz xizmatlar ortidan ma'naviyatimizga jiddiy zarar keltiradigan ofatlarni gap bilan ado etib bo‘lmasligi» aytiladi.

Maqolada SMS orqali targ‘ib qilinayotgan bunday xizmatlar ortidan oilalar buzilib ketayotgani, xiyonat va aldovlar ko‘payib borayotgani ta'kidlanadi. Hayotda uchrayotgan xuddi shu kabi holatlardan misollar keltiriladi.

Muallif mobil aloqa kompaniyalarining «bunday besharm xizmatlari milliy qadriyatlarimiz, mentalitetimizga xos odob-axloq tamoyillariga mutlaqo mos kelmasligi»ni qayd etadi.

«Birgina «Notanishni rom qil» degan jumlaning o‘zida na hayo, na andisha va na oriyat bor. Dag‘alroq izoh uchun uzr so‘raymizu, lekin «Notanishni rom qil» xizmati go‘yoki fohishalikka chorlovdek yangrayapti», deb yozadi muallif.

Gazetada nazoratchi tashkilotlar nega mobil aloqa kompaniyalarining «o‘zbekona odob-axloq mezonlariga mos kelmaydigan xizmat turlarini tarqatishiga tomoshabin bo‘lib turayotgani»ga izoh talab qilingan.

Bahodir Sharif
O‘zbekistonlik gazetxon tahallusi
Eltuz.com