Valyuta yetishmayotganidan Farg‘onaliklar jo‘natmalarini olisholmayapdi

Farg‘ona viloyati aholisi o‘z yaqinlaridan kelgan jo‘natma pullarni olishga qiynalmoqda. Banklar oldida uzunqator navbatlar hosil bo‘lgan.

«O‘g‘lim Rossiyada ishlaydi, har oyda ma'lum miqdorda pul jo‘natadi. Qish va bahor faslida qaysi bankka borsak jo‘natmalarni dollar shaklida olishimiz mumkin edi. Endi faqat tumanlarda “Agrobank”, Qo‘qon shahrida esa Ipoteka, Universal, Infinbanklar berar ekan xolos. Shuning uchun mana uch oydan buyon o‘sha pullarni olishga qiynalyapmiz. Kun bo‘yi navbatimiz kelishini kutamiz. Ba'zan dollar tugab qoldi, deb jo‘natmalarni o‘z egalariga berishni to‘xtatib qo‘yishadi» – dedi navbatda turgan ayollardan biri.

Eltuz muxbiri tumanlardan biridagi “Agrobank”ning aynan pul jo‘natmalarini tarqatish bo‘limi xodimi bilan suhbatlashganda u ham bank g‘aznasida valyuta qolmaganligini, bu kvartal uchun limit tugaganligini aytdi.

«Qo‘qon shahridagi “Ipoteka” bankiga borsam, eshik tagidagi qorovul-melitsionerlar valyuta yo‘qligini, yaqinlarimdan kelgan pulni boshqa bankdan olishim mumkinligini, “Qachon valyuta bo‘lishini so‘rasam, ular avgust oyi boshida bo‘lishini aytdi. Keyin “Infin”bankka bordim. U yerda sakkizinchi yigirmattalikda 149 bo‘lib ro‘yxatga yozildim. Bu soat 8 yarim bilan 9 lar o‘rtasidagi holat edi. Mendan keyin ham navbat olganlar bo‘ldi, – dedi yana bir ayol.

Nasima Davron qizi
Farg‘onalik muallif tahallusi
Eltuz.com