MXX xodimlari o‘nlab tadbirkor mol-mulkini tortib oldi

O‘zbekistonlik bir-birini tanimaydigan bir necha tadbirkorning “Eltuz” muxbiriga ma'lum qilishicha, 2010-2016 yillar davomida MXX Milliy havfsizlik va MX (SB) havfsizlik xizmati xodimlari o‘nlab yirik va o‘rta tadbirkorlarning ko‘chmas mulkini tovlamachilik bilan o‘z nomlariga o‘zlashtirib olgan.

O‘zbekiston Bosh Prokuraturasining yuqori martabali xodimlaridan biri bunday tovlamachilikdan jabr ko‘rgan tadbirkorlarning iddaosi mutlaqo asosli ekani, haqiqatan ham o‘z nomlariga o‘zlashtirib olishayotgani va bu hol dovom etayotganini aytdi.

Ismi sir qolishini so‘ragan tadbirkorlardan biri “Eltuz” muxbiriga isbot tariqasida ana shunday “ixtiyoriy-majburiy” oldi sotdi hujjatlarini yo‘lladi.

Hujjatda, tadbirkorning aytishicha, u o‘ziga nisbatan olib borilgan tergov paytida “hibs”ga olingan Toshkent markazidagi 300 kvadrat metrdan kattaroq kvartirasini 55 million so‘mga (6 ming dollar atrofida) Milliy Xavfsizlik Xizmati xodimiga o‘tkazib berganini ko‘rish mumkin.

Mustaqil surishtiruv olib borgan “Eltuz” muxbiri, Toshkent markazidagi kvartira egasining haqiqatan ham MXX zobiti ekanini aniqlashga muvaffaq bo‘ldi.

Taqdim qilingan hujjatlarga ko‘ra u, 37 yoshli MXX zobiti, Anvar Xalimbetovdir.

Tadbirkorning aytishicha, Toshkentda 6 ming dollarga 300 kvadrat metrdan kattaroq bo‘lgan kvartira tugul “hojatxona ham sotib olish” imkonsiz.

“Eltuz” muxbiri suhbatlashishga muvaffaq bo‘lgan yana bir nechta tadbikor o‘zlari va yaqinlari nomiga qaydga olingan ko‘chmas mulk, avtomashina va qimmatbaho buyumlarni MXX va SB xodimlari nomiga o‘tkazib, o‘z jonlarini qutqarib qolishganini aytishdi.

Ulardan birortasi o‘z nomlari oshkor bo‘lishini istamadi, ammo nashr etmaslik sharti bilan “oldi-sotdi” shartnomalarini “Eltuz” muxbiriga namoyish etdi.

O‘zbekiston Bosh prokuraturasi xodimi “yangi uy egalari”dan kamida bir nafarini yaxshi tanishini, uning marhum prezident Karimov xavfsizlik xizmatida yuqori martabali xodim bo‘lganini bildirdi.

Prokuratura xodimining aytishicha, tadbirkorlardan mol-mulkni tortib olish hollari oxirgi oylarda kuchaygan. Bu holga Shavkat Mirziyoevning iqtisodiy jinoyatlarda ayblangan shaxslarga nisbatan afv farmonini chiqargani sababdir.

MXX xodimlari, “Eltuz” suhbatdoshlariga ko‘ra, Shavkat Mirziyoev yomonotliq qilish – “uning orqasidan pichoq urish” – maqsadida afv farmonini oyo osti qilmoqda.

O‘zbekiston prezidentining o‘tgan yil oktyabr oyida qabul qilgan amnistiya qaroriga ko‘ra O‘zbekistonda 40 mingga yaqin odam afv etildi, jumladan tergovda bo‘lgan yuzlab tadbikorlarga nisbatan qo‘zg‘atilgan jinoyat ishlari to‘xtatildi.

Ammo, aftidan, xavfsizlik xodimlari paytdan foydalanib qolishayotgan ko‘rinadi.

Eltuz.com