Militsiyaga chaqirilgan dizayner Miraziz Ahmedov uyiga qaytmadi  

2 sentyabr kuni militsiya bo‘limiga chaqirilgan toshkentlik interer dizayner va bloger, 41 yoshli Miraziz Ahmedov uyidan chiqib ketganicha hanuz qaytgani yo‘q.

Miraziz Ahmedovning shogirdlaridan biri Alisher «Eltuz»ga uning militsiyaga ketganicha 3 sentyabr kuni ham qaytib kelmaganini bildirdi.

«Uni «Ibn Sino-2″  mahallasi noziri chaqirgan. Shayxontohur TIIBda ushlab turishgan bo‘lishlari mumkin. Biz xavotir olishmasin deb haligacha yaqin qarindoshlariga xabar qilganimiz yo‘q edi», dedi Alisher «Eltuz» muxbiriga.

Oxirgi marta Miraziz Ahmedov feysbukda 2 sentyabr kuni, mahalliy vaqt bilan 10.25 da: «Meni chaqirishyapti militsiyaga. Duo qilib turinglar», degan xabar qoldirgan edi.

«Hibslar stsenariysi ilgarigi uch blogerniki bilan bir xil»

Toshkentlik huquq faoli Sur'at Ikromov «Eltuz» nashriga Miraziz Ahmedovning taqdiri ham undan oldin hibsga olingan uch bloger  – Adham Olimov (Musannif Adham), Ziyovuddin Rahim va Otabek Usmonovniki bilan bir xil – diniy dastaklangan bo‘lishi mumkin, degan fikrni aytdi.

«Bu yerda stsenariy bir xil. Ushlanganlarning hammasi namoz o‘qiydiganlar. Lekin bu ularning jazolanishiga bahona bo‘la olmaydi», dedi Sur'at Ikromov.

Surat Ikromov tarqatgan xabarga ko‘ra, 28 avgustda hibsga olingan Adham Olimovning uyidagi barcha yozish uskunalari musodara qilingan. Olmazor tumani ma'muriy sudi esa unga 15 sutka qamoq jazosi belgilagan.

Adham Olimov bilan bir kunda Toshkentda Ziyovuddin Rahim va Andijonda Otabek Usmonov ismli blogerlar ham qo‘lga olingan.

Ziyovuddin Rahim Olmazor tumani sudi qarori bilan 10 kunga qamalgan. U ham militsiya xodimining qonuniy talabini bajarmaganlikda ayblanmoqda.

Otabek Usmonov esa o‘zi ishlayotgan General Motors Uzbekistan shirkatida qo‘lga olingan va 15 sutkaga qamalgan edi.

«Menimcha, bu voqealarning hammasida yangi xavfsizlik xizmatining (DXX) qo‘li borga o‘xshayapti», deya izoh berdi «Eltuz»ga Sur'at Ikromov.

Eltuz.com