Hokimlik Yangiobod turbazasi «davlat va jamiyat ehtiyojlari» uchun olinayotanini bildirdi

26 yanvar kuni Yangiobod turbazasi rahbari Ali To‘xtaevga Vazirlar Mahkamasi 2019 yil 23 yanvarda chiqargan 42-qaror asosida Toshkent viloyati hokimi G‘ulomjon Ibragimov uning yer maydoni va ob'ektlarini «davlat va jamoat foydasiga» olish haqida imzolagan qaror berildi.

Hokimning qarorida nima uchun turbazaning tortib olinayotgani, davlat va jamiyatga bunday zarurat qaerdan paydo bo‘lgani haqida hech qanday tafsilot yo‘q. 

28 yanvar kuni Ali To‘xtaevning «Eltuz» bilan telefonda bog‘langan xotini Anna To‘xtaeva mulklari tortib olinishi bilan bog‘liq muammoni hal qilish uchun advokat yollangani, bu haqda prokuraturaga yozishganini bildirdi. 

Qaror chiqishidan bir kun oldin, 25 yanvar kuni To‘xtaeva Angren shahri hokimi o‘rinbosari milliy gvardiyaning uch nafar zobiti bilan birga bazaga kirib kelishgani, hech kimni u yerdan chiqarmaslik va kiritmaslikka buyruq berishgani haqida «Eltuz»ga bildirgan edi.

Shu kuni To‘xtaeva baza hududida dam olayotgan xorijiy sayyohlar bilan harbiylar o‘rtasida ham ziddiyat kelib chiqqani haqida «Eltuz»ga ma'lum qilgan va bu hodisani reyderlik hujumi deya baholagandi. 

Sayyohlik bazasini saqlab qolish uchun kurash

28 yanvar kuni telegram, instagram va feysbukdagi guruhlarda  Yangiobod sayyohlik bazasini saqlab qolish uchun faol harakat ham boshlandi. 

Chang‘i sporti bilan shug‘ullanuvchi bir guruh shaxslar telegramdagi sahifasiga qo‘ygan videolarida agar turbaza tortib olinadigan bo‘lsa, ular uchun mashq qilish, shuningdek, kelgusida xalqaro sport musobaqalarida ishtirok etish uchun imkon qolmasligini bildirishdi.    

Shuningdek, turbazani saqlab qolish tarafdorlari Prezident virtual qabulxonasiga xat yo‘llashdi va petitsiya ham tashkil qilishdi. 

Eltuz.com