Qorovylbozorda bogchaga berilgan go‘shtdan 20 xil mikrob chiqdi

Bugun Eltuz tahririyatiga Buxoro viloyati Qorovulbozor tumanidan yana bir murojaat kelib tushdi.

Murojaatda aytilishicha, «Aloqa sifat savdo» MChJ tomonidan Qorovulbozor tumani maktabgacha ta'lim muassasalariga yetkazib berilgan go‘sht iste'molga yaroqsiz bo‘lgan.

Shikoyatga ko‘ra, go‘sht sasib ketgan, ko‘kargan va foydalanishga mutlaqo yaroqsiz. Hatto maxsus laboratoriyada o‘tkazilgan tekshiruv natijalariga ko‘ra, bu go‘shtda 20 xil turdagi mikrob aniqlangan.

Shunga qaramasdan, muassasa rahbariyati bergan shikoyatlar va laboratoriya xulosalariga e'tibor berilmagan. Go‘shtni yetkazib bergan shaxs — Afzal Xoliqov esa go‘shtni olib ketishdan bosh tortgan.

Ma'lumot uchun, chirigan go‘sht 3 haftadan buyon maktabgacha ta'lim muassasasining muzlatgichida saqlanib turibdi.

Shikoyatchilarning ta'kidlashicha, yuqori tashkilotlar tomonidan zarur choralar ko‘rilmagani bois, ularning Afzal Xoliqovga qarshi harakat qilish imkoniyatlari cheklangan.

Mazkur holat yuzasidan jamoatchilik nazorati va davlat tashkilotlarining zudlik bilan aralashuvi talab etilmoqda.