Uchko‘prikda to‘rt yigit 14 yashar qizni jinsiy zo‘rladi

2026 yil 9 yanvar kuni Farg‘ona viloyatining Uchko‘prik tumaniga qarashli Kenagas qishlog‘ida jamoatchilikni larzaga solgan og‘ir jinoyat sodir etildi. Dastlabki ma'lumotlarga ko‘ra, Buyrak qishlog‘ida yashovchi yosh qiz bir guruh yigitlar tomonidan jinsiy zo‘rlangan.

Ma'lum qilinishicha, qizni to‘rt yigit navbat bilan zo‘rlashgan. Ular qizni oldindan ijaraga olingan, Kenagas qishlog‘ida joylashgan bilyardxonada jinsiy zo‘ravonlik sodir etganlar. 

Bu bilyardxona Qo‘qon–Farg‘ona yo‘li bo‘yida, MFY binosidan atigi 200 metr uzoqlikda joylashgan.

Yigitlarning uch nafari Kenagas qishlog‘idan, yana biri esa Bog‘dod tumanining Qo‘shtegirmon qishlog‘idan ekani aniqlangan.

Tergov ma'lumotlariga ko‘ra, yigitlardan biri Lacetti rusumli avtomashinada qizni bilyardxonaga olib kelgan. Ushbu joy haqida mahallada avvaldan tarbiyasida muammosi bor yoshlar tez-tez to‘planishi to‘g‘risida gap-so‘zlar yuradi.

Qizni taniganlar uning ruhiy sog‘ligida muayyan muammolar mavjudligini ta'kidlamoqda. Bu holat jinoyatning ijtimoiy va ma'naviy og‘irligini yanada oshiradi.

Voqeadan so‘ng qizning onasi tuman Ichki ishlar bo‘limiga murojaat qilgan. Huquqni muhofaza qiluvchi organlar tomonidan dastlab jami yetti nafar shaxs ushlangan. Ulardan to‘rt nafariga nisbatan ehtiyot chora sifatida qamoqqa olish chorasi qo‘llanilgan, qolgan uch nafar shaxs esa qo‘yib yuborilgan.

Qo‘lga olingan shaxslar 2002 yilda tug‘ilgan bo‘lib, ulardan biri oilali va ikki nafar farzandga ega ekani ma'lum qilinmoqda. Ayni paytda mazkur jinoyat ishi yuzasidan tergov harakatlari olib borilmoqda.