Yangiariq hokimligida «Qabul-shou»

Yangiariq tumani hokimligi matbuot xizmati navbatdagi “fuqarolar qabuli”ni katta tadbir sifatida targ‘ib qildi. Xabarga ko‘ra, hokim Z. Matnazarov, prokuror O. Eshchonov va soliq boshlig‘i O. Abdullaev “fuqarolar muammolarini hal etish” maqsadida jonbozlik ko‘rsatganlar.

Ammo Eltuzga kelgan suratlar bu “qabul”ning haqiqiy komediya ekanini ochiq fosh qildi.

Suratlarda “fuqarolar qabuli”da o‘tirganlar aholi emas, balki mahalla raislari deydi yangiariqlik Eltuz manbasi. Ular orasida hattoki Adliya bo‘limi xodimi ham bor. Manba suratdagi adliyachiga strelka qo‘yib, “mana, fuqarolardan biri”, deb hazil qildi.

Eltuzga ma'lumot yuborgan manba vaziyatni shunday izohladi:

“Ikkita yig‘ilishni bittaga urishtirib, “qabul” deb targ‘ib qilishga nima hojat? Shouning darajasi haddan ham past bo‘lib ketyapti.”

Matbuot xizmati esa har doimgidek senariy bo‘yicha ishladi: “Murojaatlar ko‘rib chiqildi, mas'ullarga topshiriq berildi, ayrim masalalar shu yerning o‘zida hal etildi…” Qolganini esa “nazoratga olib qo‘ydik” degan klassik jumla bilan yopib qo‘yishdi.

Ammo real voqelikda “qabul” deb ko‘rsatilgan tadbir — oddiy yig‘ilish. Faqat bu safar zalni aholi bilan to‘ldirishning iloji bo‘lmagan yoki hokimiyat xalq bilan uchrashishni istamaydi. Lekin kadrlarning fosh bo‘lib qolishi natijasida “qabul”ning qopqog‘i ochilib, ichidan oddiy byurokratik atala chiqdi.

Yangiariq tumani matbuot xizmati esa yana bir bor o‘z “mahorat”ini namoyon qildi. Axir, shunday fosh bo‘ladigan rasmlarni o‘ziyoq saytga qo‘yish uchun ham ma'lum darajada iste'dod kerak.