Rossiya Ukrainani Venesuelaga «almashishni» taklif qilgan

AQSh prezidenti Donald Trampning Rossiya va Yevropa bo‘yicha sobiq maslahatchisi Fiona Xillning so‘zlariga ko‘ra, hali 2019 yildayoq Rossiya rasmiylari Vashingtonga norasmiy ravishda kelishuv taklif qilishgan: AQSh Venesuelada istagan ishini qiladi, Moskva esa Ukrainada «nima xohlasa shuni» amalga oshiradi. Bu haqda The Kyiv Independent nashri yozmoqda.

Xillning aytishicha, takliflar norasmiy xarakterda bo‘lgan: «Go‘yoki, sizda o‘z Monro doktrinangiz bor. Sizning «orqa hovlingizdan» chiqib ketishimizni xohlaysiz. Xo‘sh, bizda ham buning o‘z varianti bor. Siz Ukrainada, ya'ni bizning «orqa hovlimizda» turibsiz».

Xill xonim ushbu g‘oyani qat'iy rad etish va Ukraina savdolashish predmeti emasligini tushuntirish uchun Moskvaga maxsus yuborilganini ma'lum qildi.