«Oskar»ga da'vogar firibgar

Italiyalik «mehribon» o‘g‘il marhuma onasining ro‘molini o‘rab, yillar davomida uning pensiya yedi!

Italiyaning Borgo-Virjilio shahrida Gollivud stsenariylarini ham changda qoldiradigan «qora komediya» fosh etildi. Voqeani eshitib, kulishni ham, yig‘lashni ham bilmaysan kishi.

Italiyalik «uddaburon» o‘g‘il onasi olamdan o‘tgan bo‘lsa-da, uning nafaqasidan ajralgisi kelmadi. Xo‘sh, nima qilish kerak? Albatta, aktyorlik mahoratini ishga solib, marhuma onasining kiyimlarini kiyib, ro‘molni o‘rab, «tirikman va sog‘lomman» deya davlatning pulini shilishda davom etgan.

Balki bu «teatr» yana yillarcha sahnalashtirilgan bo‘larmidi, kim bilsin? Lekin ochko‘zlik qursin-da! Soxta «Gratsiella Dall’Olo» xonim (aslida uning mo‘ylovli o‘g‘li) shaxsini tasdiqlovchi hujjatni yangilash uchun davlat idorasiga borishgacha jur'at qildi.

Xato shu yerda edi! Uyda jimgina pensiyani yeb yotsa bo‘lardi-ku, lekin yo‘q, hujjat ham kerak bo‘ldi unga.

ZAGS xodimi — ko‘zi o‘tkir ayol edi. Qarasa, ro‘mol o‘ragan kampirshoning yurish-turishi g‘alati, qarashlari shubhali. «Bu nevarasi emasmi?» deb o‘ylagan bo‘lsa kerak, darhol politsiyaga xabar berdi.

Hozirda politsiya tergov olib bormoqda. Asosiy savollar ikkita:

1. Bu «aktyor» davlat g‘aznasidan qancha pulni o‘zlashtirib ulgurdi?
2. Sho‘rlik onaxonning arvohi qancha vaqt davomida o‘g‘lining kiyimlari ostida «yashadi»?

Italiyalik bu janobga «Yilning eng uddaburon o‘g‘li» unvonini bermasak ham, grim va performans uchun alohida mukofot bersa arziydi. Faqat endi u qolgan umrida pensiyani emas, qamoqxona balandasini yeyishiga to‘g‘ri keladi.