O‘zbekiston arzon vizani shved sayëhiga ravo ko‘rmadi

Prezident Mirziyoevning 4 dekabrdagi qaroriga ko‘ra, xorijiy sayyohlar uchun oldingi 7-15 kunlik qisqa viza muddati 30 kunlik qilib belgilandi. Viza to‘lovlari 60 dollardan 40 dollarga tushirildi. Lekin bunday vizani olish barcha chet elliklar uchun birday oson ish emas.

Bu yuzadan O‘zbekistonning Germaniyadagi konsuli Azimjon Ozodov «Eltuz» muxbiri savollariga javob berdi.

Uning so‘zlariga ko‘ra, Germaniya, Italiya, Chexiya, Turkiya va Polsha uchun joriy etilgan yengillashtirilgan viza qoidalari Yevropaning boshqa davlatlariga taalluqli emas.

«Masalan, shvedlar bilan viza jarayonini o‘zaro yengillashtirish joriy etilmagan», dedi konsul.

Uning «Eltuz» muxbiriga bildirishicha, O‘zbekistonga agar shved vatandoshi bormoqchi bo‘lsa, avvalo, u O‘zbekistondagi turizm agentligiga murojaat qilib, o‘zi haqida ma'lumot berishi kerak.

Unda sayyohning qaysi paytdan boshlab O‘zbekistonda bo‘lishi ko‘rsatiladi. Shundan so‘ng unga firma «turistik ko‘mak», keyin shu hujjat asosida tegishli ruhsatnoma rasmiylashtiriladi. Bu haqda Shvetsiya hukumatiga xabar beriladi.

Shuningdek, bu hujjatda Shvetsiyadan O‘zbekistonga borish uchun viza olish mumkin bo‘lgan davlatlardan biri ko‘rsatilgan bo‘ladi.

Shvetsiyalik sayyoh o‘sha yerga borib, O‘zbekistonga safar vizasini rasmiylashtiradi.

Boshqa bir muammo chet el vatandoshligini qabul qilgan o‘zbeklarga taalluqli.

«Agar siz shved fuqaroligini qabul qilgan, ilgari O‘zbekiston fuqarosi bo‘lgan bo‘lsangiz, albatta, birinchidan, boshqa fuqarolik olganingiz to‘g‘risida bizga xabarini berishingiz kerak, ikkinchidan, o‘rnatilgan tartibga asosan, O‘zbekiston fuqaroligidan chiqishga hujjat topshirishingiz shart», dedi Ozodov.

«Eltuz» muxbiri suhbatlashgan, o‘zbek vatandoshligidan chiqishga astoydil uringan shvetsiyalik bir o‘zbekka ko‘ra, bu ancha murakkab, uzoq, ba'zan umuman amalga oshmaydigan bir jarayondir.

Shvetsiyaning Stokholm shahrida 4 dekabr kuni o‘zbek migrantlari bilan uchrashgan O‘zbekistonning Germaniyadagi konsuli Azimjon Ozodov ularni shved vatandoshligidan kechish evaziga certifikat rasmiylashtirib, O‘zbekistondan qaytishga undagan edi.

Rassom Tuz
Eltuz.com