IIB o‘g‘irlab ketilib, kaltaklangan toshkentlik bloger ishini surishtira boshladi

Toshkent shahri ichki ishlar bosh boshqarmasi 16 dekabr kuni toshkentlik 35 yashar Amir Sharifullinning noma'lum shaxslar o‘g‘irlab ketib kaltaklashgani, sazoyi qilishgani yuzasidan arizani qabul qildi.

Shu kuni «Aziya terra» nashri  bu haqda maqola chop etilgan edi. Farida Sharifullinaning «Eltuz» muxbiriga bildirishiga ko‘ra, Aleksey Volosevichning ayni maqolasidan so‘ng surishtiruv jadallashgan.

Toshkent ShIIBB vakillari podpolkovnik Umid Qurbonov va leytenant Dmitriy Medvedskiy voqea yuzasidan Amir Sharifullinning uyiga kelishgan.

Ular odam o‘g‘irlash voqeasi tafsilotlariga aniqlik kiritish va ariza qabul qilish uchun Farida Sharifullinani ShIIBBga olib borishgan. U yerda Farida Sharifullinaning arizasini qabul qilishgan. Shahar IIBBda uning iddaolarini tinglashgan, o‘g‘lining o‘g‘irlanishi va kaltaklanishiga oid arizasini qabul qilib olishgan, tibbiy ko‘rikdan o‘tkazishga jo‘natishgan. Bu surishtiruvga juda ko‘p kuch tashlangan.

«Surishtiruv boshlangani yaxshi, albatta. Biroq faqat ular ishni siyosiy relsdan odatdagi jinoiy janjalga burib yuborishlaridan juda qo‘rqaman», deydi Farida Sharifullina «Eltuz» muxbari bilan suhbatda.

Amir Sharifullinni 10 dekabr kuni o‘zini DXX xodimi deb tanitgan ikki noma'lum shaxs «Spark» mashinasida boshiga qop kiygizib olib ketgan. Keyin uni telefon kamerasi oldida yechintirib, feysbukda tarqatgan izohlari uchun (noma'lum shaxsdan) kechirim so‘rashga majburlashganini bildirgan.

Bu harakatni u bugungi kunda yigirma mingdan ortiq odamni birlashtirgan “Toshkent-SNOS” feycbuk guruhining ma'muri bo‘lgan onasi Farida Sharifullinaga bosim o‘tkazish ehtimoli bilan izohladi.

Eltuz.com