Farg‘onada institut o‘qituvchilaridan ta'mir uchun pul yig‘ildi

Farg‘ona politexnika instituti o‘qituvchisining «Eltuz»ga yozishicha, joriy o‘quv yilidan boshlab yengil sanoat va to‘qimachilik fakulteti boshqa binoga ko‘chirilishi va institut binosining rekonstruktsiya qilinishi munosabati bilan o‘qituvchilardan pul yig‘ib olingan.

“Fakultet dekani Rustam Anorov topshirig‘iga ko‘ra, joriy yilning 20 avgustidan boshlab har bir o‘qituvchidan 255 ming so‘mdan yig‘ildi. Jami aniq 6 milliondan oshgan bo‘lishi kerak”, dedi «Eltuz»ga o‘z ismini ochiqlashni istamagan institut o‘qituvchisi.

Uning so‘zlariga ko‘ra, bu ham yetmagandek, ayol va erkak o‘qituvchilar o‘quv jihozlari, mebel va partalarni 4-qavatdan pastga va tepaga olib chiqish buyurilgan.

Fakulteti Farg‘ona shahrining Qirguli mavzesidagi “Ruxsor TV” binosi ro‘parasidagi sobiq iqtisodiyot kolleji binosiga ko‘chirilgan. O‘qituvchilardan yig‘ilgan pullar kollej binosining 4-qavatidagi 8 ta xona ta'miriga ajratilishi aytilmoqda.

«Eltuz»ga maktub yozgan o‘qituvchi bir qancha fotosuratlarni ham ilova qilgan, unda haqiqatan ham parta va institut jihozlarini tashiyotgan, xona oynalarini artayotgan o‘qituvchilar aks etgan.

Ayni ishlarga majburlash holati, maktub egasiga ko‘ra, institut binosi ta'mirdan chiqqanidan so‘ng tag‘in takrorlangan.

“Yangi bino bitganidan keyin o‘qituvchilar dekan tomonidan yana ishga solindi va ular yana partalarni ko‘tarib, 3 qavatli binoning 1-2-3-qavatiga olib chiqishdi”, deya yozadi o‘qituvchi.

Maktub egasining so‘zlariga ko‘ra, agar o‘qituvchi pul yig‘ish yoki mebel tashish kabi majburiyatdan bo‘yin tovlasa, dekan ularga hayfsan berishi yoki ishdan haydashi mumkin.

U, shuningdek, o‘z maktubida Farg‘ona politexnika instituti o‘qituvchilari ta'lim saviyasining judayam pastligi haqida yozadi.

“O‘quv saviyasi o‘ta past. O‘qituvchilar o‘z mutaxassisligiga oid bo‘lmagan fanlardan dars o‘tishadi. Talabalarga: “Bu mening fanim emas, bo‘sh o‘tirmanglar”, deb darsga kirib, 80 minutdan so‘ng chiqib ketishadi”, deydi o‘qituvchi.

Eltuz.com