Ramzanning o‘g‘li Adam Qodirov avtohalokatga uchradi

«Kavkaz.Realii» nashri o‘z manbalariga tayanib xabar berishicha, Ramzan Qodirovning o‘g‘li yirik yo‘l-transport hodisasidan so‘ng shifoxonaga yotqizilgan. Ma'lumotlarga ko‘ra, Adam Qodirov Grozniydagi Respublika klinik shifoxonasiga YTHdan keyin olib kelingan va u og‘ir ahvolda bo‘lishi mumkin.

Chechen muxolifat harakatiga tegishli NIYSO Telegram-kanali yozishicha, avariya Grozniy shahrida sodir bo‘lgan. Qodirov korteji, «odatdagidek, yuqori tezlikda — mashina ortidan mashina harakatlanayotgan paytda, to‘satdan to‘siqqa duch kelgan. Natijada avtomobillar bir-biriga urila boshlagan».

Ko‘plab jabrlanganlar orasida yana bir yuqori lavozimli chechen rahbarining o‘g‘li ham bo‘lishi mumkin, ammo uning ismi oshkor qilinmagan.

Xabarlarda ta'kidlanishicha, shifoxona yaqinidagi prospekt yopib qo‘yilgan, Grozniy shahriga kirish joylarida esa avtomobil tirbandliklari kuzatilmoqda.