O‘zbek qizning kallasini olgan ikki o‘zbek Istanbulda ushlandi

Istanbulda o‘zbek vatandoshi 37 yoshli Durdona Hokimovani o‘ldirib, jasadni parchalab musor qutilariga tashlab yuborganlikda gumonlangan ikki o‘zbek jinoyat sodir etganidan sakkiz soat o‘tib Turkiyadan Gruziyaga qochayotganida aeroportda qo‘lga olindi.

Jinoyat sodir etgan ikki o‘zbek harakatlari videoga tushib qolgan. Bu shaxslar DNK tahlillari va yuzaga chiqqan boshqa dalillar ortidan ushlangan.    

Muhtamal qotillardan birining maqtul Durdona Hokimova tomonidan sevgisi rad etilganligi haqida turk matbuoti yozdi.

Duotepadagi dahshat

Istanbulning Duotepa mahallasi «Quyili buloq» ko‘chasidagi musor qutisini titgan Usmon choyshabga o‘ralgan boshsiz jasadga ko‘zi tushdi.  

Usmon darrov politsiyaga telefon qildi. Voqea joyiga yetib kelgan Istanbul kriminal politsiyasi atrofdagi musor qutidan yelim xaltaga solingan xotin kishining kallasini topdi. Jasadning barmoq izlaridan uning Durdona Hokimova ekani aniqlandi va sakkiz soat o‘tib uni o‘ldirishda gumon qilingan ikki o‘zbek qo‘lga olindi.

Muhtamal qotillarning kimligi aniqlandi. Istanbul politsiyasiga ko‘ra, qotillik O‘zbekiston vatandoshi Dilshod Ahror o‘g‘li Turdimurodov tomonidan sodir etilgan va u o‘z aybini tergovda bo‘yniga olgan.

Jinoyatni sodir etishda va jasadni boshi va oyoqlarini parchalashda qatnashgan G‘afurjon Akmalxonovich Kamolxo‘jaev ham o‘z aybiga to‘la iqror bo‘lgan. Qotillarning har ikkalasi qurilishda ishchi bo‘lib ishlagan.

Ularning barmoq izlari va video tasvirlari Turkiya kriminal politsiyasida mavjud.