O‘zbek imomlari paxta tashviqotiga jalb etildi

Ba'zi imomlar, hattoki, paxta terish har bir musulmon uchun «vojib amal» deya hukm chiqargan, shu bilan birga, Ozodlik radiosi aksar masjidlarda namozxonlardan paxta terimi uchun pul ham yig‘ilayotganini bildirdi.

Ayni holatni Eltuz.com nashrining uchala rassomi – Tuz, Adolat va Elsevar birgalikda aks ettiradi.

Rassom Adolatxonning salla o‘ragan qahramoni «yuqori»ning birgina ishorati bilan «Paxta yig‘im-terimi har bir muslik va muslima uchun farzdir…» degan yangi aqidani takrorlaydi.

O‘z navbatida mavzuni davom ettirgan rassom Tuz qahramonlari imomning «Paxta terganlar jannatga tushadi!» degan da'vatiga javoban «Do‘zax azobini dalada ko‘rganimiz uchunmi, domla?» deya yuzlanishadi.

Hukumat va mahalliy din peshvolari xalqni terimga da'vat qilayotgan bir paytda Xalqaro tashkilotlar O‘zbekistonda xalqning ommaviy paxtaga safarbar etilishini majburiy mehnat deya qoralab keladi.

Rassomlar: Tuz, Adolat, Elsevar
Eltuz.com