Bir odam uchun so‘z erkinligi

Prezident Mirziyoev kunora o‘tkazayotgan turli yig‘ilish va uchrashuvlarida davlat amaldorlarini ayamay tanqid qilmoqda.

Mirziyoev 9 yanvar kuni militsiya xodimlari uchun selektor majlisi o‘tkazdi. O‘z nutqida u poraxo‘rlikda ayblanib ichki ishlardan haydalgan xodimlarni sanadi.

«Qonun himoyachilarining o‘zi jinoyat sodir etsa, oddiy odam dardini kimga aytishi kerak?» – dedi Mirziyoev.

Hamma narsani biluvchi

Bundan ilgarigi, 7 yanvar kuni o‘tkazgan majlisida u tibbiyot xodimlarini poraxo‘rlikda ayblagandi.

Militsiya xodimlari uchun o‘tkazgan yig‘ilishida esa Mirziyoev «GAI xodimlarining qanday pora olishini bilishi»ni aytdi.

«O‘z burchini elga xizmat tamoyiliga asoslanib emas, balki shaxsiy manfaatlardan kelib chiqqan holda bajarish kabi amaliyotlar davom etmoqda”, deb ta'kidladi jumladan Mirziyoev.

Davlat boshqaruviga yaroqsiz raxbarlar

Bundan ilgarigi majlislarida Shavkat Mirzieevning, uzoq yillar sog‘liqni saqlash va moliya sohalarida o‘zining o‘rinbosarlari bo‘lgan, Adham Ikromov, Rustam Azimovlarga dakki bergani televizorda namoyish etildi.

Prezident tomonidan tanqid qilingan davlat mulozimlarining esa hech bir e'tirozsiz, bosh egib, sukut saqlashi odatiy hol.

Tajribasizligi yuziga solingan, tahlilchilar tomonidan ko‘p yillardan beri Karimovning vorisi bo‘lishi iddao qilingan Rustam Azimov tanqidni churq etmay yutishga majbur bo‘ldi.

«Mening fojiam shundaki, men sizlar haqingizdagi hamma narsani bilaman» dedi Mirziyoev o‘z a'yonlariga.

Ehtimol, uning mulozimlari ham, so‘nggi 13 yil davomida ijtimoiy iqtisodiy masalalarga mas'ul bo‘lib kelgan mamlakatning bugungi raxbari haqida ko‘p narsalarni bilishadi.

Biroq, muammo shundaki, O‘zbekistonda so‘z erkinligi an'anaviy tarzda faqat bitta shaxs uchungina mavjuddir.

Rassom Tuz
Eltuz.com