Paxta surguniga poezdlarda – xuddi 1937 yildagidek

Bu yil O‘zbekistonda majburiy terimchilar – pedagog, tibbiyot xodimlari va boshqa turli kasblardagi byudjet va xo‘jalik korxonalari xizmatchilari paxta terimiga poezdlarda jo‘natildi.

Vodiydan Qoraqalpog‘istonga, Xorazmdan Sirdaryoga, Samarqanddan Jizzax dalalariga terimchilar tushgan vagonlar yo‘l oldi.

Surxondaryo va qashqadaryoliklar esa olis Xorazmga olib ketildi. Tashvishli bir safarbarlik ostida.

«Bu xuddi 1937 yilni eslatadi. Bir viloyatdan boshqasiga keltirib tashlangan nochor odamlar ikki oy churq etmay egilib, hammomsiz, kun bo‘yi yegan ovqatiga yetadigan miqdorda paxta terishga rozi bo‘lishmoqda», deydi mavzuni mo‘yqalamda aks ettirgan rassom Elsevar.

Stalin qatag‘onlari payti odamlar «vatan xoini» deya ayblanib, Sibir qilingan bo‘lishsa, endi ayb qo‘yilmasdan paxtaga surgun qilinishadi.

Bosh tortishsa, har qanday ayb topib, ishdan bo‘shatishlari mumkin.

Rassom Elsevar
Eltuz.com