«Futbolda Muhammad Saloh nomi tilga olinmasin!»

O‘zbek sport sharhlovchilariga MTRK rahbariyati tomonidan 2 may kungi futbol translyatsiyasida «Liverpul» jamoasi o‘yinchisi Muhammad Saloh nomini tilga olmaslik talabi qo‘yildi.

Bu haqda «Eltuz»ga ismi sir tutilishi sharti bilan TV tizimida ishlovchi xodimlardan biri xabar berdi.

Gap shundaki, O‘zbekiston TV kanallari orqali 2 may kuni olib ko‘rsatiladigan futbol chempionatining yarim final o‘yinlarida Angliyaning «Liverpul» futbol jamoasining Muhammad Saloh ismli hujumchisi Italiyaning «Roma» futbol jamoasiga qarshi to‘p suradi.

«Muhammad Saloh so‘nggi bir haftada Messi, Ronaldu kabi futbol yulduzlari darajasiga chiqdi. Shuning uchun O‘zbekistondagi sport sharhlovchilariga reportajlari davomida uning nomini tilga olmaslik juda qiyin bo‘ladi», deydi o‘zbekistonlik futbol bilimdoni.

Ayni paytda ijtimoiy tarmoqda futbol ishqibozlarining Muhammad Saloh tarafiga og‘ishi kuchaymoqda.

«Liverpul» futbol klubining 25 yoshli hujumchisi, misrlik Muhammad Salohning raqiblar darvozasiga urgan ajoyib gollaridan rag‘batlangan ayrim ishqibozlar musulmon bo‘lishga va'da berishdi.

Tarmoqda tarqalgan videolarda ingliz futbol klubi ishqibozlarining «Agar Saloh yana bir nechta gol ursa, men ham musulmon bo‘laman», deb qo‘shiq aytayotganini ko‘rish mumkin.

TV xodimining «Eltuz»ga bildirishiga ko‘ra, futbol o‘yinchisiga qo‘yilgan taqiq, asosan, «Erk» demokratik partiyasi lideri Muhammad Solih nomiga qo‘yilgan tabu bilan bog‘liqdir.

Rassom Tuz
Eltuz.com