Rejim o‘zgaradi – Akmal Saidov ham

Inson huquqlari bo‘yicha milliy markaz direktori Akmal Saidov AQSh-O‘zbekiston prezidentlari uchrashuvi oldidan o‘tgan davra suhbatidagi chiqishida zamonga qarab o‘zgarayotganini aytdi.

«O‘zbekiston, yurtim o‘zgarar ekan, men ham o‘zgarayapman albatta», dedi u «Amerika ovozi» jurnalistining «Akmal Saidov o‘zgarishga qanchalik moyil?» degan savoliga javoban.

Akmal Saidovning O‘zbekistondagi inson huquqlari buzilishiga oid xalqaro yig‘ilishlarda oldingi Karimov rejimni astoydil jazava bilan himoya qilgani ma'lum.

«Kechirib qo‘yasiz! Siz elementar tarzda bilishingiz kerakki O‘zbekiston Yevropa Kengashi a'zosi emas! O‘zbekiston Osiyo davlati!» degan edi qo‘lini paxsa qilib, 2013 yili BMT Kengashi yig‘ilishida mamlakatda «qiynoqlar» qo‘llanilishining qoralanishiga javoban.

Bu galgi chiqishida esa, mutlaqo boshqa ohang kuzatilmoqda. U Karimov davrida nohaq qamalgan faollarning turmadan ozod etilishini hukumatning yutug‘i deya e'tirof etmoqda.

«Men akademik odamman. Men avvalo olimman. Rasmiy lavozimlar ikkilamchi», dedi Akmal Saidov o‘zining o‘zgaruvchan tabiatiga izoh berib.

Rassom Tuz
Eltuz.com