Dang‘araning IIB boshlig‘i xodimlarga jinoyatchi topish kunlik rejasini belgilab bermoqda

Dang‘ara IIB boshlig‘i lavozimga tayinlanganiga endigina bir oy bo‘lgan Bozorboev Jahongir Hayotjonovich kunlik jinoyat me'yorlarini belgilab bermoqda. Bu haqida Eltuzga ichki ishlar xodimlari xabar berdi.

«Har kuni ma'muriy bayonnoma tuzishimiz, mayda bezorilik qilganlarni aniqlashimiz kerak. Jinoyatchi topolmasak jamoat joyida ichib o‘tirgan piyonistalarni tutishimiz shart» – deydi xodimlar.

Dang‘ara tuman ichki ishlar xodimlarining ta'kidlashicha, boshliq Jahongir Bozorboev har kuni fuqarolardan 500 ming so‘m miqdorida jarima undirishni talab qiladi. Ichki ishlar xodimining vakolati bormi, yo‘qmi, jarima qonuniymi – boshliqni bu masalalar mutlaqo qiziqtirmaydi.

«Haftada bir kun ham dam berilmaydi. Yangi boshliq rahbariyat ko‘z o‘ngida ochko ishlamoqchi, biz esa shu ochkoparastlik qurboni bo‘lyapmiz. Tezkor xodimlar va idorada xizmat qiladigan xodimlar profilaktika inspektorlarining natijasi yaxshi bo‘lsa (jinoyat va jarima rejasi to‘liq bajarilsa), keyin dam oladi».

Dang‘ara tumani Ichki ishlar boshqarmasi haqida shikoyatlar soni ortgach, Farg‘ona viloyati ShXB boshqarmasi boshlig‘i Shomurodov xam vaziyat yaxshi emasligini bilib, tuman IIBga keldi.

«Shomurodov majlis yakunida xodimlarga haftada bir marta dam berishni buyurdi. Lekin bu buyruq gapligicha qolib ketdi».

Eltuzga taqdim qilingan ma'lumotlarga ko‘ra, Jahongir Bozorboevning bir oylik boshqaruvi davrida 3 profilaktika inspektori iste'foga chiqqan, yana besh xodim nafaqa bahonasida tizimni tark etgan. Bosim va mantiqsiz topshiriqlardan bezgan xodimlar ish tashlash arafasida. 

Aziz Anvarovich, Dang‘ara IIB boshlig‘i faoliyatini shaxsan nazoratga olasizmi?