Pichoqbozliklarga boy hafta

O‘zbekistonda shu hafta eng ko‘p pichoqbozlik Qurbon hayiti kuniga to‘g‘ri keldi. 

Shu kuni, 21 avgustda Toshkent viloyatining Yangiyo‘l tumanida er xotinini pichoqlab o‘ldirdi. Bir necha pichoq zarbasidan so‘ng ayol voqea joyida jon berdi. Fojea aks etgan video ijtimoiy tarmoqda tarqaldi.

Ayni shu kuni kechki vaqtlarda Toshkent shahrining Shayxontohur tumanida yashovchi Q.K. ham mast holda jiyani Sh.Q.ni pichoq bilan jarohatladi. Tog‘a hibsga olindi, jiyan kasalxonaga yotqizildi.

Tag‘in shu kuni Surxondaryo viloyatining Uzun tumanida yashovchi Z.R. ismli ayol milliy taomlar kafesida tanishi Sh.S.ga pichoq urdi. Ayol qamoqqa olindi, dugona kasalxonaga yotqizildi.

22 avgust kuni Bo‘stonliq tumanidagi R.T. mast holatda o‘z xamshishasi A.F.ga pichoq urdi. A.F. kasalxonaga yotqizildi, R.T. ushlandi.

Shu kuni kechasi Buxoro viloyatining G‘ijduvon tumanida yashovchi S.B. ham uyi oldida qishloqdoshi T.J.ga pichoq bilan jarohat yetkazdi. Qishloqdosh kasalxonaga yotqizilib, pichoqboz qo‘lga olindi. Yuqoridagi hodisalar haqida IIV.UZ nashri xabar berdi

23 avgust kuni farg‘onalik 26 yoshli yigit singlisiga shilqimlik qilgan 40 yashar qo‘shnisini oshxona pichog‘i bilan chavaqladi. Qo‘shni o‘ldi. Yigit 10 yilga qamaldi. Bu haqda «Huquq» gazetasi viloyat prokuraturasidan iqtibos keltirib yozdi.

O‘tgan haftada yuz bergan pichoqbozliklar xronikasi rassom Tuz suratiga mavzu bo‘ldi.

Rassom Tuz
Eltuz.com