Rossiya va Belarus harbiylari O‘zbekistonga keldi

Rossiya va Belarus harbiy jamoalari “ArMI-2020” xalqaro armiya o‘yinlarining “Yo‘l patruli” musobaqalarida ishtirok etish uchun O‘zbekistonga keldi.

Rossiya Mudofaa vazirligi xabariga ko‘ra, harbiylar 17 avgust kuni Farg‘ona davlat universitetiga tashrif buyurib, u yerda “O‘zbekistonning bugungi taraqqiyotidagi o‘ziga xosliklar” mavzuida lektsiyani tinglashgan .

Farg‘ona davlat universiteti tarix kafedrasi o‘qituvchisi Anvar Po‘latov Rossiya va Belarus harbiy mutaxassislariga respublikadagi an'analar, fuqarolarining chet elliklarga bo‘lgan munosabatlari haqida gapirgan. Anvar Po‘latov «aholining rus tilini bilishi va postsovet hududiga do‘stona munosabatda» ekanini alohida ta'kidlagan.

“Yo‘l patruli” musobaqasida Rossiya, Belarus hamda O‘zbekistonning harbiy avtoinspektsiya va harbiy politsiya vakillari ishtirok etadi. Musobaqalarning bu bosqichi O‘zbekistonda ilk bor o‘tkazilmoqda. 

VI xalqaro armiya o‘yinlari 2020 yilning 23 avgustidan 5 sentyabriga qadar davom etadi. Musobaqalar 11 ta davlat: Ozarbayjon, Armaniston, Belarus, Eron, Hindiston, Qozog‘iston, Xitoy, Mo‘g‘uliston, Rossiya va O‘zbekiston hududida o‘tkaziladi.

Rossiya matbuotiga ko‘ra, musobaqada ishtirok etish uchun dunyoning 90 mamlakatiga, jumladan, NATOga a'zo davlatlarga taklifnoma jo‘natilgan, biroq NATO davlatlari  harbiylarining o‘yinlarda  ishtiroki “kutilayotgani yo‘q”.

Eltuz.com