O‘zbekiston endi YeOIIda kuzatuvchi. Assalom, Sovet Ittifoqi

11 dekabr kuni Yevroosiyo iqtisodiy ittifoqining onlayn sammitida O‘zbekiston va Kubaga tashkilot huzuridagi kuzatuvchi davlat maqomi berildi.

Tadbirda YeOIIga a'zo davlatlar – Rossiya, Belarus, Qozog‘iston, Qirg‘iziston, Armaniston, shuningdek, kuzatuvchi maqomidagi Moldova va taklif etilgan mamlakat sifatida Kuba yetakchilari ishtirok etdi.

O‘zbekiston prezidenti Shavkat Mirziyoev Belarus prezidenti, Oliy Yevroosiyo iqtisodiy kengashi raisi Aleksandr Lukashenkoning taklifiga binoan Yevroosiyo iqtisodiy ittifoqi (YeOII)ning videoanjuman shaklidagi sammitida ishtirok etdi.

Prezident Shavkat Mirziyoev o‘z nutqida O‘zbekistonning kuzatuvchi maqomini olish to‘g‘risidagi murojaati qo‘llab-quvvatlangani uchun minnatdorlik bildirdi.

Joriy yil may oyida Oliy Majlis O‘zbekistonning Yevroosiyo iqtisodiy ittifoqida kuzatuvchi davlat maqomida ishtirok etishi to‘g‘risidagi taklifni ma'qullagan edi.

Smartgov Consulting byurosi ijrochi direktori Aziza Umarova esa YeOII Rossiyadan boshqa a'zo davlatlarga hech qanday yaxshilik olib kelmagani, jumladan, Qozog‘iston va Belarus iqtisodi «har doimgidan ham ayanchli ahvolda» ekanini aytgan.

Uning feysbukda yozishicha, Rossiya yetakchiligidagi ittifoqqa kirgandan keyin «orqaga yo‘l yo‘q».

«Hech qanaqasiga. Tinchgina ajralish, tinch yo‘l bilan tarqalish imkonsiz. Barcha qarorlar bir mamlakat tomonidan qabul qilinadi va bu bizning mamlakat bo‘lmaydi. Ittifoqqa kirish bir tomonga chipta sotib olishdir. Assalom, Sovet Ittifoqi. Bu mening tengdoshlarim eng kam umid qilgan voqea edi», deb yozdi Aziza Umarova.

Eltuz.com