Toshkent – bosqinchiga haykal qo‘yadigan shahar

Joriy yilning 21 aprel kuni Toshkentning Kamolon mahallasida shaharni bosib olgan rus harbiylariga xotirasiga bunyod etilgan butxona qayta tiklanib, ziyorat uchun ochildi.

Voqea tarmoqdagi o‘zbek segmentini junbushga keltirdi. Bir tomon yodgorlikning tiklanishini oqlashga urinayotgan bo‘lsa, ikkinchi tomon keskin qoralamoqda.

Rassom Tuzning mavzuga oid karikaturasi qoralamasi va izohlari ostida ko‘plab bir-biriga qarama-qarshi izohlar paydo bo‘ldi.

“Ruslarga atab qurilgan butxonadan kӯra shu haykalni qurishsayam mayli edi”, deya rasmni izohladi Michael Michaelson ismli feysbuk yuzeri.

“Nemislar Toshkentga bostirib kelganida, hozir haykali turgan bo‘lardi”, deya izoh yozdi Mirsaid Haydarov ismli yuzer.

Tarmoq foydalanuvchilaridan biri hatto shu yodgorlikni portlatganga 20 ming dollar berishni va'da qildi.

Yodgorlikning tiklanishini oqlashga uringanlar ham bo‘ldi.

“Toshkentga yangi turistlarni eltish uchun nuqta, g‘oya turizm vazirliginiki”, deya izoh yozdi Bahrom Irzaev. 

 Turkiyadan yashayotgan o‘zbek faoli Hosiyat Sobir ayni voqeani milliy qadriyatlarning qoralanishi deya baholadi.

Ayni voqea bilan deyarli bir vaqtning o‘zida,  3 aprel kuni Pragada sovet harbiysi,  marshal Ivan Konevga qo‘yilgan yodgorlik demontaj qilindi. 

Butxona 1886 yili Toshkentni bosib olish chog‘ida o‘lgan 24 nafar rus ishg‘olchi askari qabri ustida tiklangan. Ayrim manbalarda ta'mir uchun Toshkent hokimligi byudjetidan kamida bir million AQSh dollari sarflangani bildirilgan.

O‘zbekiston Madaniyat vazirligi bergan ma'lumotnomada butxonani ta'mirlash ishlarini Toshkent shahri hokimligi tomonidan yollangan “Ijod-ijod” xususiy korxonasi mutaxassislari amalga oshirgani, «Toshkent quvur zavodi» homiylik qilgani aytiladi.

Madaniyat vazirligi, shuningdek, mazkur ob'ekt Vazirlar Mahkamasining 2019 yil 4 oktyabrdagi qarorining 1-ilovasiga muvofiq Milliy ro‘yxatiga kiritilmaganini bildirgan.

Eltuz.com