Corruption: Gulnora o‘margan 131$ million Toshkentga qaytmoqda

O‘zbekiston birinchi prezidentining to‘ng‘ich qizi Gulnora Karimovani “O‘zbek malikasi” deb atashardi.

U estrada xonandasi, moda va zargarlik buyumlari bo‘yicha dizayner, diplomat va hokazolar edi.

Albatta, u o‘zining imtiyozli mavqeidan muvaffaqiyatli foydalanib, bir nechta yirik xorijiy telekommunikatsiya kompaniyalaridan pora talab qildi. Buning evaziga esa ular O‘zbekiston bozorida ishlash uchun litsenziyani qo‘lga kiritdilar.

O‘zbekistonda internet tariflari dunyodagi eng yuqori narxdagilardan biri hisoblanadi.

Gulnora Karimova “ishlab topgan” pullarini O‘zbekistonda saqlamadi. Ular Frantsiya, Buyuk Britaniya, Latviya, Malta, Lyuksemburg, Belgiya, Germaniya, Ispaniya, Niderlandiya va AQShdagi banklarga hamda ko‘chmas mulklarga joylashtirildi.

Taxminiy hisob-kitoblarga ko‘ra, gap 1 milliard AQSh dollari haqida ketmoqda. 2014 yilda “O‘zbek malikasi” boshiga og‘ir kunlar tushdi va u tovlamachilik hamda mablag‘larni noqonuniy o‘zlashtirishda ayblanib sudlandi.

Endi o‘g‘irlangan pullarni O‘zbekiston fuqarolariga qaytarish vaqti keldi.

Frantsiya Karimovaning 10 million dollarini allaqachon O‘zbekistonga qaytarib bergan. Biroq qaytarib berish tartibida ushbu mablag‘larning qaerda, qanday va kim tomonidan taqsimlanishini nazorat qilish mexanizmini yaratish ko‘zda tutilmagan edi.

Shveytsariya esa Karimovaning 131 million dollar mablag‘ini qaytarishga rozi bo‘ldi va ikki mamlakat o‘rtasidagi kelishuvda quyidagilar ta'minlanishi majbur etib belgilandi:

– pulni qaytarish jarayonida oshkoralik va hisobdorlik;

– qaytarilgan pullar O‘zbekiston xalqi manfaatlari uchun ishlatilishi;

– eng muhimi, mustaqil fuqarolik jamiyati va matbuot kelishuvning bajarilishini nazorat qilishi.

Lekin katta muammo bor. Gap shundaki, O‘zbekiston dunyodagi eng korruptsiyalashgan davlatlardan biri. Hokimiyat tomonidan ochiqlik choralari ko‘rilganiga qaramay, mamlakatda mustaqil nodavlat tashkilotlar yo‘q, jurnalistlar va blogerlar esa nazorat ostida ishlaydi.

Eltuz.com