Rishtonlik fermerlar pilla shartnomasini prokuror bosimi ostida imzolashdi

 “Eltuz”ga yetib kelgan ma'lumotlarga qaraganda, Rishton tumanida prokuror bosimi ostida fermerlar ipak qurti boqib, pilla yetishtirish shartnomasini imzolashga majburlangan.

Bu haqda “Eltuz”ga bir-biridan mustaqil ikki manba xabar qildi.

– Rishtonda pillachilik korxonasi boshlig‘i ayol kishi, – deydi fermerlardan biri. – Avval o‘zi menga qo‘ng‘iroq qildi va 7 quti ipak qurti boqib berishim, buning uchun pilla shirkati bilan shartnoma tuzishim zarurligini aytdi. Ishim ko‘pligini, g‘alla va paxta yetishtirishga ixtisoslashgan fermer ekanimni, qolaversa, dalamning chetiga tut daraxti ekmaganimni, menda ipak qurti boqish uchun ozuqa bazasi yo‘qligini bildirdim.

Fermerning so‘zlariga ko‘ra, shundan so‘ng pilla korxonasi rahbari uni “boshqacha gaplashish” haqida ogohlantirgan. Ko‘p o‘tmay, uni tuman prokurori chaqirgan.

“Borsam, xonasida 10-12 chog‘li fermer o‘tiribdi. Avval menga “siz zo‘rmisiz, nega qurt boqmayman deyapsiz, shunaqa boqasiz”, deb qattiq gapirdi. Agar shartnomaga imzo qo‘yib, muhr bosib bermasam, fermerlik faoliyatimni davom ettirish yoki ettirmaslik masalasini ko‘rib chiqish bilan tahdid qildi. Noiloj, bo‘sh shartnoma qog‘oziga imzo qo‘yib, muhr bosib berdik”, dedi manba “Eltuz”ga.

Ipak qurti fermerlarga qanday taqsimlanadi? Hamma fermerga bir xil reja qo‘yiladimi yoki boshqacha tartib bormi?

Bu savollarga javob bergan yana bir fermerning bildirishicha, ba'zida 3 gektar yerga 1 quti ipak qurti boqish majburiyati yuklanadi. Gohida esa istalgan me'yor belgilanadi. Aniq me'yor yo‘q.

“Men pilla shirkati boshlig‘i telefon qilib aytgan zahoti borib, shartnoma imzolab keldim. Baribir “qilmayman, tutmayman”, deyishdan foyda yo‘q. Tepadagilar qilasan dedimi, qilamiz. Bugun yoki kecha fermerlik qilayotganim yo‘q. Yillarki, shunday bo‘lib kelgan”, dedi fermer.

Uning ta'kidlashicha, bu kabi qo‘shimcha ishlardan bo‘yin tovlab bo‘lmaydi. Chunki baribir yo hokim, yoki prokuror orqali fermerlarga bosib o‘tkaziladi. Oxir-oqibat kaltak baribir yana fermerning boshida sinadi.