Tanishini jalablikka yollagan jizzaxlik ayol 3 yilga qamaldi

G‘allaorol sudi tanishini Turkiyaga jalablikka yubormoqchi bo‘lgan ayol ozodligini uch yilga chekladi.

Sud 23 yoshli sudlanuvchi Ozoda Hazratqulovani O‘zbekiston Respublikasi Jinoyat – Protsessual Kodeksining 135-moddasi birinchi bandi bo‘yicha aybdor deb topdi.

Eslatib o‘tamiz,  mazkur moddada odamlardan foydalanish uchun ularni yollash bilan bog‘liq jinoyatlar nazarda tutilgan.

Voqea esa quyidagicha: Bir nafar farzandi bor yolg‘iz ona, Dilnoz Toyirova akasi bilan biroz muddat Rossiyada ishlaydi, lekin, Rossiyaning injiq ob-havosi unga og‘irlik qiladi –  revmatizm orttirib qaytadi. 

Kunlarning birida Jizzaxdagi “O‘rda” ekobog‘ida yoshgina uddaburon qiz Ozoda bilan tanishib qoladi. Ozoda Dilnozga hamdard bo‘lib, uni Turkiyaga ishga yuborishini aytadi. Turkiyada qizlar oyiga 1000-15000 dollargacha topyapti, deydi Ozoda. Lekin, Dilnoz shunchalik nochor ahvolda ediki, uning hatto telefoni yo‘q edi. Ozoda Dilnozga o‘zining ekrani siniq ayfonini tuzattirib berib, sovg‘a qiladi va ishonchiga kiradi. Turkiyada ishi yurishib ketsa, bundan zo‘r telefonlar olishini aytadi. Hatto, Turkiyaga yetib olishi uchun o‘zi unga bilet olib beradi. Biroq Samarqand aeroportiga dugonasini olib ketayotgan paytida u tezkor guruh hodimlari tomonidan qo‘lga olinadi. G‘allaorollik Dilnozning omadi keldi, Ozodaning esa biznesi barbod bo‘ldi. U uy qamog‘iga olindi.

Shu o‘rinda muhim eslatma:  Ozoda Dilnozga uni Turkiyaga fohishalikka jo‘natayotganini aniq-tiniq aytgan. Lekin, bu uning jazosini yengillashtirmaydi, baribir ish “shahvoniy yoki boshqa maqsadda foydalanish uchun aldash yo‘li bilan odam yollash” bandiga asosan klassifikatsiyalanadi. 

Chunki, bunday vaziyatda jabrlanuvchi o‘ziga taklif etilayotgan ish muhitidan mutlaqo bexabar bo‘lgan. Eltuz uydagi gapni ko‘chaga olib chiqadi. Kanalimizga obuna bo‘ling, videolarimizga layk bosing!