Bag‘dodlik fermerning yeri auktsionda qanday sotildi?

40 yoshli Elyor Imomov “Hojiakbar Hojimurod bog‘i” fermer xo‘jaligi rahbari. Farg‘ona viloyati Bag‘dod tumanining cho‘l hududida 2017 yildan buyon fermerlik qiladi. Uning 36,6 gektar yeri bor.

U doimo hokimiyat tomonidan berilgan vazifalarni to‘liq uddalaydi va har bir ishni ularning yo‘l yo‘riqlari bilan bajarishga odatlangan.

Judayam namunali fermer bo‘lsa muammosi nimada deb savol berishingiz mumkin?!

Muammo shundaki, yaxshisi uni o‘zi gapirib bera qolsin.

2023 yili auktsionda yutib oldim deb, ikki odam oldimga keldi.
Men yerimni tuman zahirasiga qaytarish bo‘yicha ariza yozmaganman deb, ularni dalaga kiritmadim. Bu voqea 2023 yilning iyul oylarida bo‘lgan edi. Hozir ham auktsionda yutib olganlar tez tez bezovta qilib turishibdi.

Elyor hozirgi kungacha auktsionda yutib olgan shaxslar bilan sudlashib yurganligini aytmoqda.

Unda fermerning yeri auktsionga qanday chiqib ketib qoldi?

Avvallari (taxminan 5-6 yil oldin) biz qishloq xo‘jalik bo‘limiga oq qog‘ozga pechat bosib, qo‘l qo‘yib berib kelaverardik. Ular bankka, turli idoralarga, soliqqa bizning nomimizdan ariza, xat qilib kiritib, biz hisobda ishimizni ham yengillatib berishardi.

Kimdir katta ehtimol bilan Bag‘dod tumani qishloq xo‘jalik bo‘limi xodimlaridan biri men qo‘l qo‘yib, pechat bosgan oq qog‘ozga mening nomimdan 6 gektar yerimni tuman zahirasiga olish to‘g‘risida ariza yozib bergan. O‘sha arizani ko‘rdim. Yozuv meniki emas. Kimdir yozgan. Sudga bu yozuvni ham taqdim etganmiz.

Ekspertlar bu yozuvning meniki emasligi haqida xulosa berishgan, deydi fermer.

Ayni kunlarda Bag‘dod tumani qishloq xo‘jaligi bo‘limi xodimlari o‘zgarib ketgan. Fermer bu ishni qaysi mutaxassis qilganligini bilmaydi.

Faqatgina u yeri noqonuniy auktsionga chiqib ketganligini aytmoqda xolos.

Eltuz Bag‘dodlik fermerning ayni muammolari yuzasidan kelgusida rasmiylar munosabati va qarama qarshi tomonlar fikriga ham o‘rin berishga tayyor.