BOTIR ZOHIDOVGA KAMBAG‘ALLAR HISOBIDAN SAYoHAT QILISh MYeROSMI?

Kambag‘allikni qisqartirish va bandlik vazirligi delegatsiyasining Jenevaga safari uchun davlat byudjeti hisobidan taxminan 250–300 million so‘m mablag‘ sarflangan.

Bu haqda Eltuzga ta'qiblardan qo‘rqib ismi oshkor bo‘lishini istamagan vazirlik mulozimi ma'lum qildi.

Joriy yilning 2–10 iyun kunlari Shveytsariyaning Jeneva shahrida o‘tkazilgan Xalqaro Mehnat Tashkilotining 114-sessiyasida mazkur vazirlikdan 5 nafar xodim qatnashgan. Ular orasida vazir Botir Zohidov, o‘zini Davlat mehnat inspektsiyasi boshlig‘i deb tanishtirgan, aslida o‘rinbosar hisoblangan Nilufar Amanniyazova va xalqaro bo‘lim xodimlari ham bo‘lgan.

Har bir delegatsiya a'zosi uchun kuniga 3 million so‘m mehmonxona, 1,2 million so‘m ovqatlanish va taxminan 10 million so‘mlik borish-qaytish aviabilet xarajatlari hisoblangan. 

Ammo ushbu safarning natijasi kutilganidek bo‘lmadi — Xalqaro Mehnat Tashkiloti O‘zbekistonning mehnat inspektsiyasi samarasiz ish olib borayotganini ta'kidlab, mamlakatni qora ro‘yxatga kiritdi.

Jamoatchilikda esa shunday savol paydo bo‘ladi: bu miqdordagi mablag‘lar qanaqa natija uchun sarflandi va agar natija bo‘lmasa, davlat puli kim tomonidan va qanday qilib qaytariladi?

Bu ham yetmagandek, vazirlik tanqidiy xulosalardan hech qanday xulosa chiqarmasdan 2025 yil iyul oyi oxirida Janubiy Koreyaga va avgust oxirida Italiyaning Turin shahriga yangi delegatsiya jo‘natishga tayyorgarlik ko‘rayotgani haqida ishonchli ma'lumotlar mavjud. Har ikkala safarga ham N.Amanniyazova boshchilik qilishi kutilmoqda.

Shuningdek, XMT bilan aloqalarni «mustahkamlash» bahonasida vazirlik xodimlari har oy Jenevaga kamida ikki marta borib kelayotgani ma'lum qilingan. Ammo bu safarlardan qanday foyda bor, qanday ish amalga oshirilmoqda — xalqqa hisobot berilmayapti.

Ishchi muhitda esa guruhbozlik, shaxsiy aloqalar ustuvor. Oddiy xodimlar chetda qolib, vazirga yaqin shaxslar safarlarga yuborilayotgani aytilmoqda.

Bir oila 1,2 million so‘m bilan butun oyni o‘tkazayotgan sharoitda, bir amaldor bu mablag‘ni bir kunda sarflayapti. Davlat puli — bu xalqning puli. Agar bu kabi holatlarga barham berilmasa, vazirlik xalq ishonchi va sabrini boy berishi ehtimoldan xoli emas.

Izoh o‘zingizdan.