OLTIN FABRIKASIDA OTIShMA YuZ BYeRDI

Angren shahridagi AGMK ChRU Idoraviy harbiy qo‘riqlash xizmati joylashgan «Oltin saralash fabrikasi» hududida 2 avgust kuni soat 19:30 larda X.J. ismli xodim xizmati davomida o‘z hamkasbi K.M.ni xizmat pistoleti bilan otib qo‘ydi. Bir qarashda bu shaxsiy tushunmovchilikdek tuyuladi, aslida esa — bu butun boshli tizimni botqoqqa botirgan korruptsiya, e'tiborsizlik va qo‘rquv oqibatida sodir bo‘lgan fojiadir.

Ta'kidlanishicha, X.J. — o‘z kasbining fidoiysi bo‘lgan, bir necha yil davomida fabrikada yuz bergan o‘g‘riliklar, ichki «sxema»larga qarshi kurashgan yagona qo‘riqchi edi. 

U ko‘p marta guruh rahbariyatiga ruhiy holati yomon ekanini, stressda yurganini aytgan, yordam so‘ragan. Ammo guruh boshlig‘i Xojiboev Sobit unga nafaqat quloq solmagan, balki X.J.ni xatarli postlarga jo‘natib, undan qutilishga harakat qilgan. Sababi — X.J. «oltin-ko‘mir o‘g‘irlash sxemalari»dan xabardor bo‘lib qolgan edi.

ChRUdagi «rejimnik» laqabli G‘iyosjon va «Sher» laqabli ishchi, ular ortidan yuradigan aka-uka, jiyanlardan iborat guruh – 48-shtolnya atrofidagi madanli toshlarni nazorat qiladi. 

Ular tayyor oltin mahsulotini fabrikadan chiqarish, kameralarni o‘chirish, «reja bajarilmadi» deb yolg‘on hisobotlar tayyorlashga ma'sul bo‘lgani aytilmoqda.

«20 iyul kuni Guzaksoy shaxtasida ro‘y bergan tog‘ qulashi natijasida bir ishchi halok bo‘ldi, yana biri og‘ir ahvolda. Bu voqeadan so‘ng ChRU direktori Miraxmedov shaxta rahbarlarini almashtirib, o‘zini oqlagan ko‘rinib, ta'tilga ketdi. Bu uning ChRUni tashlab, ARU direktorligiga intilayotgani haqidagi mish-mishlarni yanada kuchaytirdi» – deydi xodimlar.

Ayni paytda fabrikada pistoletdan o‘q uzilgani jamoatchilikka ma'lum qilinmagan. Hokimiyat va AGMK rahbariyati hamon sukut saqlamoqda. 

Ehtimol, o‘g‘rilik, korruptsiya va yolg‘on hisobotlar fosh bo‘lmasligi uchun ushbu hodisa imkon qadar bosdi-bosdi qilinadi. Eltuz esa O‘zbekistondagi hokimiyatning suiste'mol qilinishi, korruptsiya va tolon toroj bilan bog‘liq xolatlarni yoritishda davom etadi. Kanalimizga obuna bo‘ling, video yuzasidan izohlar qoldiring.