O‘zbekiston TIV Rossiyaga yana bir nota yubordi

O‘zbekiston Tashqi ishlar vazirligi avgust oyida Rossiyada o‘zbekistonlik ekani aytilgan taksi haydovchisi bilan bog‘liq holat ortidan Rossiya TIVga nota yubordi, deya xabar bermoqda vazirlik matbuot kotibi Ahror Burxonov.

Qayd etilishicha, notada mazkur videodagi shaxsni aniqlash va unga nisbatan qonuniy choralar ko‘rish so‘ralgan.

Avgust oyining oxirlarida tarmoqda tarqalgan videoda asabiy rus millatchisining o‘zbek migranti shaxsini haqoratlab, bosim o‘tkazayotgani aks etgan edi.

«Hurmatli vatandoshlar, sizlarga yana bir bor eslatib o‘tamiz. O‘zbekiston fuqarolari dunyoning qaysi nuqtasida bo‘lishidan qat'iy nazar, davlatimiz himoyasida hisoblanadi», — deyiladi vazirlik xabarda.

«Sen bomjsan, qaerga kelganingni bilasanmi o‘zi. Sen bu yerga ishlagani kelgansan. Ishla chakagingni ochmasdan. Sen qulsan, ruslarning qulisan» deya kurakda turmaydigan haqoratlar yomg‘irini yog‘diradi rus millatchisi boshini ko‘tarishga ham jur'ati yetmayotgan o‘zbek migrantiga. 

«Yo men noto‘g‘ri aytayapmanmi, O‘zbekistonda to‘toq ham yo‘qligi uchun bu yerga kelgansan» deydi va unga javoban migrant o‘zbek to‘g‘ri aytayapsiz, deya uning gapini ma'qullaydi. 

Bundan ilgari joriy yilning 10 iyunida ham O‘zbekiston Tashqi ishlar vazirligi Rossiya Federatsiyasiga diplomatik nota yo‘llab, Rossiya hududida o‘zbekistonlik muhojirlarga nisbatan qo‘pol va hurmatsiz muomalalar bo‘yicha qat'iy e'tiroz bildirgan edi.

Rasmiy ma'lumotlarga ko‘ra, so‘nggi vaqtlarda Rossiyada ayrim holatlarda o‘zbekistonlik fuqarolar ruxsatsiz tekshiruvlar va kuch ishlatish kabi xatti-harakatlarga duch kelmoqda. TIV bu holatlarni jiddiy tashvish bilan qayd etar ekan, bunday harakatlar ikki davlat o‘rtasidagi do‘stona munosabatlarga mutlaqo zid ekanini ta'kidladi.

“Barcha fuqarolarning sha'ni va qadr-qimmati himoya qilinishi, inson huquqlari va xalqaro huquq normalariga rioya etilishi shart”, — deya bildirilgan edi vazirlik bayonotida.

Moskvadagi O‘zbekiston elchixonasi tomonidan Rossiya Tashqi ishlar vazirligiga topshirilgan notada quyidagi masalalarga alohida e'tibor qaratilgan.

Rossiya hududida ayrim zobitlar tomonidan O‘zbekiston fuqarolariga kuch ishlatish holatlari;

Bu holatlar inson huquqlarining yaqqol buzilishi ekanligi;

Voqealarga huquqiy baho berish zarurligi.

TIV ushbu masalani doimiy nazoratda ushlab turishi va kerak bo‘lsa, qo‘shimcha choralar ko‘rilishini ma'lum qilgan edi.

O‘tgan qisqa davr Rossiyadagi O‘zbekistonlik migrantlarga ta'qib va bosimlar ortgani kuzatildi. Xususan o‘tgan oyning boshida Sankt Peterburgda o‘zbekistonlik migrantlar avvaliga taksi xizmati bilan shug‘ullanish, keyinchalik esa ruslarga ovqat yetkazib berish, kur'erlik xizmatlari bilan shug‘ullanishdan mahrum qilindi. 

Eltuz Rossiyadagi Millatchilik va bunga  O‘zbekiston Tashqi ishlar vazirligi munosabatiga oid voqealarni yoritishda davom etadi. Kanalimizga obuna bo‘ling. Video yuzasidan izohlar qoldiring.