Qo‘rg‘ontepalik narkofurushlar qo‘lga olindi

Andijon viloyati Qo‘rg‘ontepa tumanida yashovchi, 1984–1991 yillar oralig‘ida tug‘ilgan 6 nafar fuqaro o‘zaro til biriktirib, qirg‘izistonlik narkosavdogardan 2 kg gashish moddasini 15.000 AQSh dollariga sotib olishga kelishib dastlab 1950 AQSh dollarini boshlang‘ich badal sifatida unga yetkazib berishayudi.

O‘z navbatida Qirg‘iz Respublikasi fuqarosi giyohvandlik vositasini o‘zbek-qirg‘iz davlat chegarasidan kontrabanda yo‘li bilan o‘tkazib, Xonobod shahridagi xufiya joyda qoldirdi.

Qo‘rg‘ontepalik og‘ufurushlardan biri esa ushbu zahri qotilni olib, o‘zining avtomashinasida Xonobod-Qo‘rg‘ontepa yo‘nalishida harakatlanayotgan vaqtida Davlat xavfsizlik xizmati xodimlari tomonidan qo‘lga olindi. Jinoiy guruhning qolgan 5 nafar a'zosi ham protsessual tartibda qo‘lga olingan. 

Ekspertiza xulosasiga ko‘ra, ushbu gashish giyohvandlik vositasining sof og‘irligi  qariyb 2 kg (1 kg 954 gr) ekanligi aniqlandi. Hozirda jinoiy guruhga nisbatan qamoq ehtiyot chorasi qo‘llanildi.