Muhtojlar haqini yegan Sariosiyolik raxbar qo‘lga olindi

15 sentyabr kuni Surxondaryo viloyati Sariosiyo tumani Inson ijtimoiy xizmatlari bo‘limi ijtimoiy to‘lovlar sho‘'basi rahbari Nurullo Durmanov 2 ming AQSh dollari pora bilan qo‘lga olindi. Huquq-tartibot organlari tomonidan uning arizasi rasman olindi.

Ordan bir kun o‘tib, 16 sentyabr kuni u egallab turgan lavozimidan ozod etildi. Bu holat ijtimoiy xizmatlar tizimida yillar davomida yo‘l qo‘yib kelinayotgan suiste'mollar va nazoratsizlikning yana bir yorqin misoli bo‘ldi.

104 million so‘mlik kamomaddan poraxo‘rlikkacha

5 oy avval ham shu bo‘lim faoliyatida 104 million so‘mlik kamomad aniqlangan edi. Biroq Surxondaryo viloyati Inson ijtimoiy xizmatlar boshqarmasi rahbari Muxiddin Togaev bu holatga ko‘z yumib, mas'ullarni qo‘llab kelgani jamoatchilik orasida katta norozilik uyg‘otgan.

Muhtojlarning haqqi yeyilmoqda

Ijtimoiy to‘lovlar haqiqiy muhtoj oilalarga qo‘llab-quvvatlov bo‘lishi kerak edi. Ammo Durmanov va uning atrofidagilar ayrim to‘q oilalarning mulkini «0» qilib ko‘rsatib, soxta hujjat tayyorlab, haqiqiy ehtiyojmandlarni orqada qoldirib kelgani fosh etilmoqda.

Uning sheriklari sifatida tilga olinayotgan Xasan Hujamqulov va Yoqub Rahimovning ham faoliyati to‘liq tekshirilishi, ularning qilmishlariga huquqiy baho berilishi jamoatchilik talabidir.

Javobgarlikdan hech kim qocholmaydi

Bunday holatlar bir shaxsning ishi emas – ularning ortida rahbariyat sukuti va tizimiy mas'uliyatsizlik turibdi. Shu bois, boshqarma rahbari Muxiddin Togaevning ham bu kabi holatlarga ko‘z yumib kelgani bo‘yicha javob berishi zarur.

Xalq adolat kutmoqda

Kam ta'minlangan oilalarning haqqini yeyish – bu oddiy jinoyat emas, balki xalq ishonchini suiste'mol qilishdir. Jamoatchilik pora evaziga lavozimini unutib qo‘yganlar qonun oldida adolatli jazoga tortilishini kutib qolmoqda.