Rossiya Turkiyaning pomidor ortilgan kemasiga hujum qildi

12 dekabr kuni Rossiy harbiy kuchlari Qora dengiz akvatoriyasida Turkiyaning oziq ovqat mahsulotlari ortilgan kemasiga raketa bilan zarba berdi.

Turkiyaga tegishli bo‘lgan «Kuruoglu» savdo kemasi bortida bir necha manbalarga ko‘ra, oziq-ovqat mahsulotlari, jumladan, pomidor bo‘lgan. 

Xabarlarda aytilishicha, kema Rossiya Federatsiyasi Qurolli Kuchlari tomonidan uchirilgan raketa bilan nishonga olingan. Oqibatda kemaning korpusiga zarar yetgan, lekin ekipaj a'zolari orasida jiddiy jabrlanganlar yo‘qligi ma'lum qilinmoqda.

Turkiya Tashqi ishlar vazirligi intsident yuzasidan norozilik bildirib, bu harakatni xalqaro huquqni buzish va savdo kemalarining xavfsizligiga tahdid deb baholadi. Rasmiy Anqara bu masalada tezkor tushuntirish va kafolat talab qilgan.

Rasmiy Moskva bu hodisa yuzasidan aniq va ochiq izoh bermagan. Ayrim harbiy manbalar nishon «xato» olingani oqibatida voqea sodir bo‘lganini izohlarda bildirmoqda, biroq bu iddaolar ham rasman tasdiqlanmagan.

Bunday voqealar xalqaro munosabatlardagi keskinlikni oshirib, oziq-ovqat yetkazib berish zanjirlariga salbiy ta'sir ko‘rsatishi ta'kidlanmoqda.