Enter Engineering – oyliksiz ish va yashirilayotgan baxtsiz hodisalar

Yenter Engineering kompaniyasi ishchilariga yana bir necha oylab maosh to‘lamayapti.  O‘z haqqini oylar davomida ololmayotgan ishchilar, mehnat xavfsizligi bilan bog‘liq jiddiy muammolar va baxtsiz hodisalar yashirilyapti. 

Xususan, Olmaliq shahridagi MOF-3 zavodi hududida 1 gektar maydonda qurilgan KRP sexi tomi shu kunlarda yoqqan qor yukini ko‘tara olmay qulab tushdi. 

Hodisadan so‘ng sex zudlik bilan o‘rab olindi, videoga olish qat'iyan taqiqlandi, ishchilarning telefonlari olib qo‘yilldi. Guvohlarning aytishicha, telefonini topshirmagan ishchilar ob'ektga kiritilmagan. Holat bosdi-bosdi qilinmoqda. 

24 soat ishlaydigan zavodda shunday avariya bo‘lib,«hech kim jarohatlanmadi, o‘lim holati yo‘q» degan g‘irt yolg‘on bayonot berildi.

Ayni paytda ishchilar allaqachon 2 oydan ortiq vaqt davomida maosh ololmay ishlab yurishibdi. Ushbu hodisadan so‘ng to‘lovlar yanada kechikishi kutilmoqda.

«Kompaniyada oddiy ishchilar manfaatlari ikkinchi darajaga tushib qolgan, rahbariyat va yuqori bo‘g‘indagi boshqaruv uchun esa sharoitlar mutlaqo boshqacha. Yoqilg‘i sotish, kabel o‘g‘irlash kabi holatlar mayda-chuyda o‘g‘rilik bo‘lib,  bunga e'tibor ham bermay qo‘ydik.  Lekin butun boshli sex tomi qulasayu, qurbon yo‘q deb turishsa…  Qadrimizga achinamiz-da»  deydi xodimlar.

Mehnat inspektsiyasi, Qurilish nazorati, Bosh prokuratura va boshqa vakolatli organlardan MOF-3 zavodidagi hodisaga ochiq va xolis baho berishni, ishchilarga oylik to‘lovi masalasini o‘rganishni, mehnat xavfsizligi va boshqaruv tizimi bo‘yicha rasmiy tekshiruv o‘tkazishni talab qilamiz. 

Kompaniya og‘ir moliyaviy ahvolda bo‘lsa, kompaniya rahbariyati GMS Yukon, Cadillac, Tahoe, Land Cruiser,  Prado kabi qimmatbaho moshnlarni minishga,  doimiy yangilab turishga qaydan pul topyapti? 

Bu moshnlarning har biri milliardlab so‘m turishi hech kimga sir emas. Agar kompaniyada haqiqatan ham pul yo‘q bo‘lsa, bu hashamat kimning hisobidan?