Xabarovskda o‘zbek migranti urushga jo‘natish urinishi qurboni bo‘lgan

12 dekabr kuni Rossiyaning Xabarovsk shahrida sodir bo‘lgan hodisa yuzasidan Eltuzga qo‘shimcha ma'lumotlar yetib keldi. Manbalarga ko‘ra, voqeadan so‘ng jabrlangan yigitning bo‘yniga jinoyat ilishga urinishlar bo‘lgan.

Aytilishicha, bunday holat avval ham kuzatilgan. Jumladan, joriy yil oktyabr oyida 18–20 yoshlar atrofidagi yigitlarni tun bo‘yi urib-so‘kib, azoblab, turli bosimlar qilib urushga borishga majburlash holatlari qayd etilgan.

Murojaatchilarning bildirishicha, ushbu holatlarda O‘zbekistonning konsullik idoralari tomonidan amaliy yordam sezilmayapti. Telefon orqali bog‘lanishganda esa “kelib, shaxsan murojaat qiling” degan javoblar berilmoqda. 

Biroq jabrlangan shaxslar uchun 900 kilometr yo‘l bosib borib arz qilish amalda deyarli imkonsiz. Ko‘pchilik “omon chiqdim” deb, shikoyat qilmasdan ketishga majbur bo‘lyapti.

Murojaatchilar ta'kidlashicha, bunday holatlar ommaviy axborot vositalari va blogerlar tomonidan ko‘tarilmasa, vakolatli idoralar tomonidan ochiq muhokamaga olinmay qolmoqda. Shu sababli jamoatchilik e'tiborini ushbu muammoga qaratish muhimligi ta'kidlanmoqda.