THE BELL: Россия Ўзбекистон орқали санкцияларни четлаб ўтмоқда

Россия қўшни давлатлар, жумладан Ўзбекистон орқали санкцияларни четлаб ўтаётгани, Украинага қарши ишлатилётган қурол аслаҳаларда Ўзбекистонда ишлаб чиқарилган деталлар топилгани ҳақида ёзмоқда мустақил The Bell нашри.

МДҲ давлатлари бир вақтнинг ўзида Европадан импорт қилинган молларни Россияга экспорт қилиш ҳажмини оширишган.

Россия қўшни давлатлар, жумладан, Ўзбекистондан мол етказиб берилишини сезиларли даражада оширгани эвазига Европа санкцияларини четлаб ўтмоқда. Бу ҳақда бир қатор мамлакатларнинг божхона статистикасини ўрганган Россиянинг The Bell нашри хабар бермоқда.

Мақолада келтирилган инфографик маълумотларга кўра, 2023 йилнинг биринчи ярмида Россия ўтган йилнинг шу даврига нисбатан қўшни давлатлардан импортни 37 фоизга (14 миллярд, бир юз миллион долларгача) оширган. Шу билан бирга, Россияга қўшни давлатлар олти ой ичида Европадан импортни 22 фоизга оширган.

2022-йилда Қозоғистон, Грузия, Арманистон, Ўзбекистон, Озарбайжон, Қирғизистон, Тожикистон ва Туркиядан Россияга экспорт ҳажми чорак даражага ошиб, 25 миллиард 800 миллион долларни ташкил этган.

Евростат маълумотларига кўра, ўтган йили Россияга қўшни давлатлар бир қатор Европа товарлари импортини оширган. Улар орасида: телекоммуникация ускуналари, микроэлектроника, электр жиҳозлари, транспорт ускуналари, маълумотларни қайта ишлаш учун электрон эҳтиёт қисмлари, жумладан компютерлар, серверлар, қаттиқ дисклар, смартфонлар, компютернинг ташқи қурилмалари мавжуд.

Европа Тараққиёт ва Тикланиш Банки иқтисодчилари феврал ойида Россия Европа Иттифоқи чекловларини қўшни давлатлар, яъни Арманистон, Қозоғистон, Қирғизистон ва Грузия орқали четлаб ўтаётганини билдирган эди.

Июн ойида Киев Иқтисодиёт мактаби ва Ермак-Макфол санкциялар гуруҳи иқтисодчилари томонидан тайёрланган ҳисоботда, Россиянинг Украинага қарши ишлатаётган қурол аслаҳаларида Ўзбекистондаги «Фотон» конструкторлик бюроси томонидан ишлаб чиқарилган эҳтиёт қисмлари топилгани билдирилган.

Давлат статистика қўмитаси маълумотларига кўра, 2022-йилда Ўзбекистоннинг Россияга экспорти 46,8 фоизга ошиб, 3 миллиард 800 минг долларни, 2023 йилнинг январ-июн ойларида эса 5 ярим фоизга ошиб, 1 миллиард 27 миллион долларни ташкил қилган.

Эслатиб ўтамиз, аввалроқ Элтуз нашри Европарламент Ўзбекистонни санкцияларни четлаб ўтгани учун текширишга чақираётгани ҳақида ёзган эди. Элтуз Россияга жорий этилаётган ғарб санкциялари ва уларнинг Ўзбекистонга таъсирини ўрганишда давом этади. Каналимизга обуна бўлишни, видеоларимизга лайк босишни унутманг.