Xorijiy sarmoyadorlar O‘zbekistonga kelishni istamayapti

Sputnik internet nashrining Xususiylashtirish, monopoliyadan chiqarish va raqobatni rivojlantirish davlat qo‘mitasidagi manbaga asoslanib bildirishicha, O‘zbekistonda 2016 yilning birinchi choragida dastlabki umumiy narxi qariyb 340 million dollar bo‘lgan korxona va banklarning davlat ulushlarini sotish rejasi bajarilmagan.

Ulushlar savdoga qo‘yilganidan ikki oy o‘tib ham ularga xaridor topilmagan. Shu sababli qo‘mitaga joriy yilning 1 aprelidan boshlab birja va birjadan tashqari savdoga qo‘yilgan davlat ulushlari qiymatini 10 foiz arzonlashtirish buyurilgan.

Umuman, xususiylashtirish dasturiga ko‘ra, 2016 yilning 1 iyuniga qadar O‘zbekistonga xorijiy sarmoyalarni jalb etish maqsadida 59 ta korxonaning 437 million dollarlik davlat ulushi sotilishi kerak.

Lekin bu rejalar amalga oshadiganga o‘xshamaydi. O‘zbekiston rasmiylari mamlakatda salkam dunyoda eng yaxshi sarmoyaviy muhit yaratilganini iddao qilayotgan bir paytda investorlarning bunga umuman ishonmayotgani bu boradagi haqiqiy ahvolni yaqqol ko‘rsatib turibdi.

Chunki xorijiy investorlar O‘zbekistonga sarmoya kiritishning qanday xatarlari borligini o‘z tajribasida allaqachon sinab ko‘rgan.

Eltuz.com