Yolg‘onning fosh etilishi yoki O‘zbekiston «buyuk o‘zgarishlar bo‘sag‘asi»da turibdimi?

Yaqin bir necha oylar avval, mustaqillik bayramiga tayyorgarlik ko‘rayotgan paytimizda, hali «buyuk yo‘lboshchi» tirik ekanida gazetalarimiz «biz buyuk o‘zgarishlar davrida yashayapmiz», deya ayyuhannos solib yotgandi.

Bu yolg‘on ekan. Biz nafaqat bu davrda yashamagan ekanmiz, unga yaqin ham kelmagan ekanmiz. Aslida biz endigina «buyuk o‘zgarishlar bo‘sag‘asida» ekanmiz. Bu davrga bizni Shavkat Mirziyoev olib kirar ekan.

Buni muvaqqat prezident daxldor O‘zLiDeP partiyasining nashri bo‘lmish «XXI asr» gazetasi (10.11) baralla aytib, hammamizning ko‘zimizni ochdi.

Prezidentlikka nomzod Shavkat Mirziyoevning gazetada e'lon qilingan dasturi tahlilini o‘qib, shunday xulosaga kelish mumkin.

Unda aytilishicha, dasturda ifodalangan talay vazifalar hozirdanoq amalda joriy etilayotganini e'tirof etish joiz. Xususan, iqtisodiyotning turli sohalarini rivojlantirish uchun 8 ta maxsus dastur qabul qilingan bo‘lib, yaqin besh yilda umumiy qiymati qariyb 40 milliard dollar bo‘lgan 657 ta investitsiya loyihasi amalga oshiriladi.

Muallif shu paytgacha Toshkentda xususiy kompaniyalar tomonidan qurilayotgan turar joylar narxi qimmatligini, ularni faqat o‘ziga to‘q oilalar «maktabda o‘qiyotgan farzandlari, hatto bog‘chadagi nevara-chevaralariga sotib olayotgani»ni «fosh etadi» va Sh.Mirziyoevning kambag‘allar uchun uy-joylar qurish rejalarini maqtaydi.

Maqolada Sh.Mirziyoev dasturida elektr ta'minotini yaxshilash uchun elektr stantsiyalarini modernizatsiya qilish, ishbilarmonlik muhitini yaxshilash uchun kichik biznes va xususiy tadbirkorlikka erkinlik berish kabilar borligini eslatar ekan, bu nomzod «davlatni boshqarish fanini kabinetda o‘tirib yoki laboratoriya sharoitida o‘rganmagani»ni bildiradi.

Muallif Shavkat Mirziyoevning dasturida bayon etilgan g‘oyalar va vazifalarning ro‘yobga chiqishi mamlakatimizning barcha jabhalari qiyofasini «tubdan o‘zgartirishi aniq» ekanini ta'kidlar ekan: «Vatanimiz buyuk o‘zgarishlar arafasida turibdi», deya bashorat qiladi.

Bahodir Sharif
O‘zbekistonlik gazetxon tahallusi
Eltuz.com