Qanot Odil: Mesxeti turklaridan kechirim so‘rashimiz kerak

1989 yilning may-iyun oylarida O‘zbekistonning Farg‘ona viloyatidagi mahalliy o‘zbeklar bilan yuz bergan etnik to‘qnashuvlar davomida mesxeti turklarining uylari vayron etildi.

Rasmiy ma'lumotlarga ko‘ra, 52 nafar mesxeti turki vahshiyona o‘ldirildi. Taxminan mingta uy yoqildi va talon-taroj qilindi.

Shu munosabat bilan bir qancha o‘zbek ziyolilari bayonot bilan chiqishdi. «Eltuz» bayonot matnini o‘z saytida e'lon qilganidan so‘ng media tarmog‘ida mavzu yuzasidan bahs-munozara qizidi.

«Aslida 31 yil avval shunday xulosaga kelgandim. Biz, albatta, tavbamizni aytishimiz kerak. O‘shanda judayam mudhish ish bo‘ldi. Agar biz o‘zimizni jamiyat deb bilsak, millat deb bilsak, har bir vatandoshimizning qilmishi uchun mas'uliyat sezishimiz kerak. Ana o‘shanda millat shakllanadi. Bunday bo‘lmaguncha biz millat emasmiz», dedi «Unutmadik. Kechirim so‘raymiz!» aktsiyasi tashabbuschilaridan biri Qanot Odil «Eltuz»ga bergan intervyusida.

«O‘tmishda sodir bo‘lgan shunga o‘xshash gunohlarni zimmasida olib yurgan xalqlar kam emas. O‘z tarixida bu kabi sharmandali harakatlar qilmagan jamiyatni topish qiyin. Muhimi, sukut saqlamasdan, bu gunohlarni tan olish, ularga xolis baho berish va tegishli xulosalar chiqarishdir», deyiladi, jumladan, bayonotda.

Bayonotning to‘liq matni bilan ushbu link orqali tanishishingiz mumkin.

Eltuz.com