BMT maxsus ma'ruzachisining O‘zbekistonga olqishi va tavsiyasi

BMTning inson huquqlari bo‘yicha maxsus ma'ruzachisi Fionnuala Ni Aolain O‘zbekiston hukumatining Suriya, Iroq va Afg‘onistondagi ayollar va bolalarni vataniga qaytarish va reintegratsiya qilishga qaratilgan “Mehr” operatsiyasini yuqori baholadi. 

“Oila birligi va jamiyatni qo‘llab-quvvatlashga asoslangan o‘zbek modeli vatanga qaytarish, bola manfaatlarini ko‘zlash, ziddiyatli hududlardan qaytgan ayollarni mazmunli reintegratsiyalash bo‘yicha siyosiy, huquqiy va ijtimoiy harakatlar markazida bo‘lgan ilg‘or tajriba namunasidir”, dedi Ni Aolain.

Suriya shimoli-sharqidagi lagerlarda minglab ayollar va bolalar mojarolashayotgan guruhlar tomonidan o‘zboshimchalik bilan hibsga olingan. 

BMT ekspertlarining ta'kidlashicha, ular qiynoqqa yoki boshqa shafqatsiz, g‘ayriinsoniy yoki qadr-qimmatni kamsituvchi muomalaga, zo‘ravonlik, ekspluatatsiya kabi xalqaro huquqqa zid munosabatga duchor bo‘lishadi.

BMT maxsus ma'ruzachisi dunyo mamlakatlarini bu insonlarni o‘z vataniga qaytarishda O‘zbekistondan namuna olishga da'vat etdi.

Shu bilan birga, Ni Aolain O‘zbekistonga 10 kunlik tashrifi yakunida terrorizmga qarshi kurashda inson huquqlari va asosiy erkinliklarini, jumladan, fikr bildirish, yig‘ilish, adolatli sudlov, ozodlikdan mahrum qilish, qiynoqlardan ozod qilish, diniy erkinlik va e'tiqod huquqini himoya qilish choralarini kuchaytirishga chaqirdi. 

U O‘zbekistonning terrorizm va ekstremizmga qarshi kurash to‘g‘risidagi qonunlari, xususan, Jinoyat kodeksidagi ko‘plab moddalarning keng va noaniq mazmuni bilan bog‘liq xavotirlarini bildirdi. 

Maxsus ma'ruzachining ta'kidlashicha, xalqaro huquq, shuningdek, terrorizmga qarshi kurash va inson huquqlari bo‘yicha standartlarga muvofiqligini ta'minlash uchun ularni jiddiy qayta ko‘rib chiqish lozim. 

U terrorizmni moliyalashtirishga qarshi kurash bo‘yicha amaldagi me'yoriy hujjatlarning fuqarolik jamiyati va notijorat tashkilotlarga salbiy ta'sirini bartaraf etish zarurligini qayd etdi.

Ni Aolain ilgari milliy xavfsizlik bahonasida hibsga olingan, xususan, qiynoqlar, g‘ayriinsoniy yoki qadr-qimmatni kamsituvchi muomalaga uchragan shaxslarning huquqlari jiddiy buzilishi holatlarini bartaraf etish uchun tergov o‘tkazish, mazmunli himoya vositalari va tovon to‘lash imkoniyatiga ega bo‘lgan rasmiy va mustaqil tekshirish mexanizmini yaratishni tavsiya qildi.

Eltuz.com