Termizda Universitet xodimlari oylik berilmaganidan shikoyat qilishmoqda

Eltuzga Termiz davlat muhandislik va agrotexnologiyalar universiteti xodimlaridan navbatdagi fosh qiluvchi murojaat kelib tushdi. Unda aytilishicha, universitet rahbari Rasul To‘raev 1000ga yaqin xodimni ikki oydan beri maoshsiz qoldirgan. 

Sababi? Universitet qarzi 8,5 milliard so‘m ekan. Lekin bu pullarni kim yegani hali ham noma'lum.

O‘qituvchilarning aytishicha, hatto 0.25 va 0.5 stavkadagi darslar o‘tilib, ish bajarilgan bo‘lsa ham, haq to‘lanmayapti. Dardingni aytish uchun rektorning xonasiga borsangiz, “mudiringga bor”, “dekaningga bor” degan javob beriladi. U yerdan ham haydashadi. Qisqasi, maosh so‘rash — jinoyat, og‘iz ochish — qo‘poruvchilik.

Janob To‘raevning o‘zi esa “hammangni quritaman” degan shoirona tahdidlari bilan nom qozonmoqda. Ilgari “yaxshi rahbar keldi” deb umid qilingan bo‘lsa, hozir u “vallomat” degan nom bilan tilga tushgan.

Ishga kirish uchun esa, xabarlarga ko‘ra, 2000 dollar bilan “yangi hayot” boshlash mumkin. Sababi, rektor “viloyat hokimi tomonidan qo‘yilgan”, demak “topshiriq ko‘p, xarajat ham shuncha”. Ya'ni, rektorlik — investitsiya. Haq to‘lanmas ekan, lekin to‘planar ekan.

Fosh bo‘lgan yana bir gap — pensiyadagi 9 nafar ustozni ishdan haydash rejasi. Ilmga umr bag‘ishlaganlar hozir ortiqchalik qilmoqda.

Qizig‘i shundaki, Rasul To‘raev avval Termiz davlat universitetida prorektor bo‘lgan, hozir uning o‘rnidagi U.Axmedov TDMAUga o‘tibdi. Ikkalasi bir-birining kursisini almashgan. Bittasi Termizga, boshqasi uning o‘rniga. Bu orada kirdikorlar ham “qoplangani” taxmin qilinmoqda.

Murojaat egalari Vazirlikdan qat'iy chora ko‘rishni so‘rayapti. Agar javob bo‘lmasa, boshqa tashkilotlarga chiqishga tayyor ekanlarini ma'lum qilishdi. Eltuz esa kuzatishda davom etadi.