Jazoni ijro etish tizimida korruptsiya da'volari

Eltuz manbalariga ko‘ra, Ichki ishlar vazirligi Jazoni ijro etish departamenti tizimida yillar davomida korruptsiyaviy sxemalar shakllangan bo‘lishi mumkin. Xususan, departamentning sobiq rahbari sifatida tilga olinayotgan polkovnik Tursunov Rustam Rahmonovich hamda uning yaqin hamkori deb ko‘rsatilayotgan polkovnik Qodirov Zavqiddin G‘aybullaevich faoliyati yuzasidan jiddiy da'volar ilgari surilmoqda.

Manbalarning aytishlaricha, Qodirov Zavqiddin avval Navoiy viloyatidagi jazoni ijro etish tizimida rahbarlik lavozimida ishlagan. Korruptsiya bilan bog‘liq holatlar sabab ishdan olingan. Shunga qaramasdan, keyinchalik u Tursunov Rustam Rahmonovich tomonidan yana yuqori lavozimga tayinlangan. 

Manbalar ushbu ikki mulozim orqali Navoiy, Samarqand, Buxoro, Jizzax va Sirdaryo viloyatlaridagi jazoni ijro etish muassasalariga oziq-ovqat mahsulotlari bozor narxidan ancha qimmat baholarda, tanish tadbirkorlar orqali yetkazib berilganini da'vo qilmoqda. Bu jarayonda tadbirkorlardan noqonuniy ravishda “otkat” pullari olingani, mablag‘lar esa Qodirov Zavqiddin orqali yig‘ilib, Tursunov Rustamga yetkazilgani aytilmoqda.

Shuningdek, jazoni ijro etish muassasalarida ishlab chiqarilgan g‘isht, ohak va boshqa qurilish materiallari ham manfaatdor shaxslar tomonidan o‘zlashtirilgani haqida ma'lumotlar keltirilmoqda. 

Qoraqalpog‘iston Respublikasida joylashgan Jasliq koloniyasining Navoiy viloyati Zarafshon shahriga ko‘chirilgan. Yangi turma muassasasi qurilishi yopiq tender orqali Navoiy shahrida ro‘yxatdan o‘tgan, Qiziltepa tumaniga mansub bo‘lgan “Sharq qurilish” xususiy korxonasiga berilgan. Manbalarga ko‘ra, ushbu korxona rahbari sifatida Shuhrat ismli tadbirkor tilga olinadi va u Tursunov Rustam Rahmonovich hamda Qodirov Zavqiddin bilan yaqin aloqada bo‘lgan.

Bundan tashqari, Navoiy shahri, Qiziltepa tumani va Zarafshon shahrida joylashgan jazoni ijro etish muassasalariga oziq-ovqat mahsulotlari bir necha yil davomida hech qanday tender o‘tkazilmasdan, bozor narxidan yuqori baholarda yetkazib berilgani haqida da'volar mavjud. 

Ko‘chmas mulk masalasida ham qator qoidabuzarliklar tilga olinmoqda. Aytilishicha, Toshkent shahri va Navoiy shahri hududlarida qurilgan ko‘p qavatli uylardan kvartiralar uy-joyga muhtoj bo‘lmagan ayrim xodimlarga arzon narxlarda, tanish-bilishchilik asosida taqsimlangan. Bu jarayonlar ham Tursunov Rustam imzosi bilan amalga oshirilgani iddao qilinmoqda.

Manbalar, shuningdek, Tursunov Rustam va Qodirov Zavqiddin nomiga yoki ularga yaqin shaxslar, jumladan, Qodirov Zavqiddinning shar'iy nikohida bo‘lgan Hurriyat ismli ayol, shuningdek Tursunov Rustamning shar'iy nikohdagi turmush o‘rtog‘i Feruza ismli ayol nomiga Navoiy va Toshkent shaharlarida kvartiralar, yer uchastkalari hamda boshqa qimmatbaho mol-mulklar rasmiylashtirilganini ta'kidlamoqda.

Yuqorida keltirilgan ma'lumotlar yuzasidan Eltuzda hozircha vakolatli idoralar rasmiy munosabati mavjud emas.