“Barqarorlik reytingi”da kiritilgan o‘zgarishlar nega amalga oshmayapti?

So‘nggi kunlarda bir qator tadbirkorlar Vazirlar Mahkamasining 662-son qaroriga muvofiq “Barqarorlik reytingi”da kiritilgan o‘zgarishlar amalda to‘liq aks etmayotgani haqida Eltuzga murojaat qilmoqda. 

Ularning aytishicha, yangilangan tartib kuchga kirganiga vaqt o‘tganiga qaramay, reyting ko‘rsatkichlari kutilganidek hisoblanmayapti, ayrim holatlarda ballar pasayib ko‘rinmoqda. Bu esa tadbirkorlar uchun moliyaviy rejalashtirishda qo‘shimcha qiyinchiliklar keltirib chiqarayotgani ta'kidlanmoqda.

Murojaatchilarning bildirishicha, muammo bo‘yicha Soliq qo‘mitasining ishonch telefonlariga qo‘ng‘iroq qilinganda “baza yangilangani sababli to‘laqonli ishlamayapti” mazmunida javoblar berilgan. 

Shu bilan birga, tadbirkorlar QQS qaytarish jarayonlarida ham kechikishlar kuzatilayotganini, bu esa aylanma mablag‘ga ta'sir qilayotganini qayd etmoqda.

Tadbirkorlar reyting hisoblash mexanizmi, ma'lumotlar bazasi qachon to‘liq yangilanishi, shuningdek, QQS qaytarish bo‘yicha texnik va tashkiliy choralar haqida rasmiy tushuntirish berilishini so‘ramoqda.