Buxoroda rasmiylar Jirinovskiyni quchoq ochib kutib olishdi

Vladimir Jirinovskiy boshchiligidagi Rossiya delegatsiyasi 2 noyabr kuni Buxoroga keldi.

Rossiya Davlat dumasi deputatlaridan iborat delegatsiyani, O‘zA xabariga ko‘ra, Buxoro xalqaro aeroportida O‘zbekiston parlamenti raisining birinchi o‘rinbosari Sodiq Safoev, Buxoro viloyati hokimi O‘ktam Barnoevlar kutib olishdi.

Jirinovskiy Markaziy Osiyo davlatlarining Rossiyaga qo‘shilishi tarafdori ekanini o‘z bayonotlarida ochiq shaklda bildirib kelgan rus millatchisi sifatida tanilgan.

Uning O‘zbekistonga kelishi ochiqlangach, «Erk» demokratik partiyasi bayonot tarqatib, Prezident Shavkat Mirziyoevdan Jirinovskiyning O‘zbekistonga «qilishi mumkin bo‘lgan har qanday safarini» taqiqlashga chaqirgan edi.

Ayni paytda Jirinovskiyning O‘zbekistonga kelishi boshqa o‘zbek faollari g‘azabini ham kuchaytirdi. 

«Jirinovskiy doim o‘zbeklarni, turkiylarni, musulmonlarni haqoratlab, nizo va fitna keltiradigan bir radikalchi bo‘lsa, unga qanaqasiga, yurtimizga kelishiga ruxsat berildi?» deya yozdi o‘z murojaatida o‘zbek tahlilchisi Anvar Nazir.

Tarmoqda Jirinovskiyni «norozilik namoyishi bilan kutib olish» chaqiriqlari yangradi.

«Qani Buxoro, Samarqand, Toshkent, Anjon, mard o‘g‘lonlar bormi? Jirik kelishiga qarshi tinch namoyishga chiqishga duxi yetadigan o‘zbek bormi 33 million xalq ichida?» deya yozdi Elsevar O’zbek niki ostidagi feysbuk yuzeri.

«Qiziq, bizning qancha mulozimlarimiz, Jirinovskiyning yumshoq va iliq qo‘llarini olishga chiqisharkan))) jurnalistlardanch fotolarini kutamiz)» deya yozdi feysbuk blogeri Nailya Rahman‎.

Vladimir Jirinovskiyning Buxoroga safari LDPR liderining O‘zbekistonga ilk rasmiy tashrifidir.

Rassom Tuz
Eltuz.com