«Temir daftar»da moddiy muhtoj bo‘lmaganlar ham bor

«Temir daftar»da, ya'ni surunkali kam ta'minlanganlar ro‘yxatida to‘qlikdan cho‘chqaday semirgan, yem yegan eshakdek tepong‘ich kimsalar ham bor. Ko‘p.

Ular bu ro‘yxatga shantaj vositasida o‘rnashgan yoki MFY raisi bilan moddiy yordamni o‘zaro «arra» qilishga kelishgan.

Xalqning ko‘zi ko‘r emas-ku, hamma narsani ko‘rib turibdi.

Mahalladagi yosh, baquvvat, g‘izilab mehnat qilib pul topib yurgan, dang‘illama uyda yashaydiganlar doimiy yordamga muhtojlar safida ekanligini eshitib, hayratdan yoqa ushlaysiz.

Ular orsiz, imonsiz zotlardir.

Haqiqiy muhtojlar bilan gaplashsangiz, ular hech qanday moddiy yordam olmayotganini eshitib taajjublanasiz.

Chinakam muhtoj odam odatda oriyatli, nomusli bo‘ladi, ayrimlarga o‘xshab ko‘zining siydigini oqizib, rahbarlar yoniga bormaydi.

Puli, moli yetarli, o‘zi sog‘lom va yosh kimsalar qanaqa qilib muhtojlar ro‘yxatiga o‘rnashib oldi ekan?!

Bu ishing uyat bo‘lmaydimi, desangiz, gap ta'sir qilmaydi, chunki ularda uyat yo‘q.

Albatta, bu kabi adolatsizliklar sofdil odamlar qalbida ijtimoiy norozilik, davlat odamlariga nisbatan ishonchsizlik kayfiyatini paydo qilishi shubhasizdir.

Deputat degan jonivor xalq bilan tez-tez uchrashishi, ularni mazlum qilgan muammolarni aniqlashi va yuqori davlat idoralariga havola qilishi kerak-ku.

Qurg‘ur bizning deputatlar ham o‘zimizga mos…

Davlat ajratayotgan moddiy yordam haqiqiy ehtiyojmandlarga yetib borsin.

Tovba. Kam ta'minlanganlar ro‘yxatida ertadan kechgacha ichib axlatiga botib yuradigan sassiq alkashlar ham borligi esa qiziq.

Alkash va dangasalar, hatto yegani noni qolmaganida ham, muhtoj hisoblanmaydi.

Yozuvchi Rahimjon Rahmat hikoyalaridan