Ta'lim vazirligidagi korruptsionerlar bitta daftardan qancha foyda qilishadi?

Faqat e'tibor berib, Xalq ta'limi vazirligining 2016-2017 o‘quv yilida 1-sinfga qabul qilinadigan o‘quvchilar va kasalligi tufayli yakka tartibda uyda ta'lim olayotgan bolalar uchun o‘quv qurollari xarid qilish uchun ochiq tender savdolari o‘tkazilishi to‘g‘risidagi e'lonini o‘qiganingizdan keyin ko‘nglingiz bir narsani sezgandek bo‘ladi.

E'tiboringizni 12 varaqli oddiy daftar uchun belgilangan narx tortishi mumkin. Chunki agar boshlang‘ich sinfga boradigan farzandingiz uchun bunday daftarni oddiy kantselyariya do‘konidan donabay, ya'ni chakana narxda 250 so‘mdan xarid qilayotganingiz (bunda naqd yoki plastik kartochkadan to‘lashingiz mumkin) esga tushadi-yu, keyin vazirlik qariyb 8 million daftar uchun eng yuqori xarid narxi sifatida nega 350 so‘m belgiladi ekan, deb o‘ylanib qolasiz.

Chunki buncha daftar xarid qilayotganda narx yana anchagina pasayishi, masalan, 200 so‘mga tushishini savdogarlar yaxshi biladi. O‘sha ulgurji sotayotganlar ham qo‘shimcha qiymat solig‘i, joy puli, daromad solig‘i va hokazolarni qo‘shib shuncha narx belgilaydi.

Albatta, vazirlik daftarni 200 so‘mdan ham sotib olishi mumkin. Lekin eng yuqori narx 350 so‘m belgilangani, bu esa korruptsiya uchun keng maydon ekanini tushunadigan odamga bu yerda 10 so‘m ham millionlar uchun zamin yaratishini anglab yetganidan keyin, xohlaysizmi-yo‘qmi, orada millionlab so‘m o‘ynayapti, deb fikr yuritishiga asos bo‘ladi.

Deylik, vazirlik 7 862 058 ta daftar uchun 350 so‘mdan maksimum 2 milliard 751 million so‘mdan ortiq mablag‘ni mo‘ljallayapti. Bozordagi narxini taxminan 200 so‘m deb hisoblagan taqdirimizda ham buncha daftar 1,5 milliard so‘mdan sal oshadi. Agar to‘g‘ridan-to‘g‘ri ishlab chiqaruvchining o‘zidan oladigan taqdirda bu narx ancha arzonlashishi mumkin.

Biz bu raqamlarni oddiy xaridor sifatida hisob-kitob qildik. Shunda ham orada milliard so‘mdan ortiq mablag‘ «o‘ynayapti». Agar uning yoniga vazirlik sotib olmoqchi bo‘lgan millionlab akvarel, plastilin, rangli qalam, penal, rasm daftari, rangli qog‘oz to‘plami, sharikli ruchka, yelim, sumkalarni ham qo‘shsangiz (albatta, bozordagidan ancha baland narxda), orada millionlab so‘m pul kimlarningdir cho‘ntagidan joy oladi, degan to‘xtamga kelasiz.

Eltuz.com