Matbuot qarzdorlarni izza qilish yo‘liga o‘tdi

Farg‘ona viloyati bosh nashri “Farg‘ona haqiqati” soliq, oqava suv va elektr energiyasidan qarzdorlar ro‘yxati va mavzuga oid maqolalarni e'lon qildi

“Mol-mulk va yer solig‘ini o‘z vaqtida to‘lash borasida daxldorlik tuyg‘usini unutganlar xususida” deya atalgan maqolada soliqlardan qarzdorlar ro‘yxati ilova qilinadi.

Ro‘yhatda Farg‘ona viloyatining turli tumanlarida yashovchi jami 13 nafar jismoniy shaxs va bir qancha qarzdor korxonalarning nomlari keltirilgan.

“Oqava suv iste'moli xizmatidagi muammolar” maqolasida xizmatdagi muammolar emas, qarzdor tashkilotlar ro‘yxati keltirilgan.

Qarzdorlar qatorida nomi tilga olingan «Energomarkaz» bosh hisobchisining Eltuzga bildirishicha, gazetada keltirilgan raqamlar noto‘g‘ri.

Oqava suv ta'minotida uzilishlar bo‘lganligi sababli, korxona ma'lum muddat suv uchun shartnomada ko‘rsatilgan mablag‘larni to‘lamagan. Bugungi kunda xo‘jalik sudi qarori bilan kam-kamdan bu mablag‘ Suv oqava tashkilotiga o‘tkazib berilmoqda.

“Yorug‘i yaxshi-yu, to‘lovi yomon…mi?!” maqolada esa elektr energiyasidan qarzdorligi yuqori bo‘lgan shaxslar ro‘yxati keltirilgan.

Hokimlikka yaqin o‘z ismini aytishni istamagan shaxsning Eltuzga bildirishicha, qarzdorlarning nomini matbuotga chiqarishdan maqsad, ularni izza qilib, qarzlarni samarali tarzda, sud harajatlarisiz tezroq undirib olishdir.

Biroq ayni maqolalarda sovuq kunlardagi elektr uzilishlari, gazning tanqisligi va ichimlik suvi muammolari haqida hech narsa deyilmaydi.

“Eltuz” maqolaga munosabatni o‘rganar ekan, gazetaga chiqishdan hech kimning unchalik xijolat bo‘lmayotganligini bildi.

“Baribir bu gazetalarni hech kim o‘qimaydi” dedi qarzdorlar ro‘yxatidagilardan biri.

«Gazetalarning rost gapni yozmasligini hamma biladi. Shuning uchun sizdan boshqa hech kim bu masalaga qiziqqani yo‘q», deydi u.

«Muammolar haqida iste'molchilar bilan yuzma-yuz gaplashishdan qochib, ularni endi matbuotda biryoqlama izza qilish yo‘liga o‘tishgan», deydi Eltuz muxbiriga svetning surunkali uzilishlaridan zada bo‘lgan boshqa bir qo‘shtepalik ayol.

Viloyat tug‘uruqxonalarida elektr uzilishlari tufayli, dvijok va lampa chiroqlar yorug‘ida chaqaloqlar dunyoga kelayotgani, viloyat hokimligi majlislari paytida ham chiroqning o‘chib qolgani, ayni muammoning yanada keskinlashayotganini anglatadi.

Nasima Davron qizi
Eltuz.com