Ana saylov, mana saylov

24 dekabr – yakshanba kuni Toshkent shahar xalq deputatlari tuman kengashlariga bo‘lib o‘tgan saylov xalqning bunday tadbirga umuman ishonchi yo‘qolganini ko‘rsatmoqda.

«Eltuz»ning Toshkent shahridagi saylov uchastkalaridan birida ishlagan manbasining aytishicha, saylovda mazkur saylov uchastkasida ro‘yxatga olingan minglab saylovchilarning bor-yo‘g‘i 150-200 nafari qatnashgan.

«Bu kechki soat oltigacha bo‘lgan ko‘rsatkich. Negadir bu yil juda sust o‘tyapti saylov. Endi ko‘rsatkich qilish uchun saylov uchastkasi komissiyasi a'zolari uyma-uy yurishga chiqib ketishdi», dedi manba.

Aholining saylovga ishonchni yo‘qotgani prezident Shavkat Mirziyoevning joriy yilda siyosiy partiyalar vakillari bilan uchrashuvda ularning ura-urachiligiyu qarsakbozligini tanqid qilgani ortidan kuzatilmoqda.

Bundan tashqari, kuni-kecha parlamentga qilgan murojaatiga ham prezident deputatlarni hech bo‘lmasa «vovullab qo‘yish»ga da'vat etgan edi.

Aytish mumkinki, davlat rahbarining shuncha chaqiriqlariga qaramay, qo‘g‘irchoq partiyalar sifatida ko‘riladigan siyosiy kuchlar bu safar ham avvalgidek amorf holatdan chiqa olmadi.

O‘zLiDePning sayyohlik avtobuslariga g‘ata-g‘at qilib bir-yarim targ‘ibot qilganini aytmasa, hammasi «eski hammom, eski tos» qabilida bo‘ldi.

«Ertaga saylov natijalari e'lon qilinganida qanday raqamlar ko‘rsatilishi bilmayman. Ammo saylovchilarning bu yilgidek sustkashligi ilgari kuzatilmagan edi. Odamlar majbur bo‘lganidanmi, gap tegishidan qo‘rqqanidanmi, chiqar edi», dedi «Eltuz» manbasi.

Uning aytishicha, bu yil saylovga o‘z nomzodini qo‘yganlar imkon qadar qizg‘in targ‘ibot-tashviqot o‘tkazishga harakat qilgan. Shunga qaramay, saylovdagi faollik darajasi ko‘rsatib turibdiki, aholi bu targ‘ibotlarga qiziqish bildirmagan.

Eltuz